په دم سره شفا موندل

عَنْ أَبِي سَعِيدٍ رَضِيَ اللَّهُ عَنْهُ ،قَالَ: انْطَلَقَ نَفَرٌ مِنْ أَصْحَابِ النَّبِيِّ صَلَّى اللهُ عَلَيْهِ وَسَلَّمَ فِي سَفْرَةٍ سَافَرُوهَا ،حَتَّ ىنَزَلُوا عَلَى حَيٍّ مِنْ أَحْيَاءِ العَرَبِ ،فَاسْتَضَافُوهُمْ فَأَبَوْا أَنْ يُضَيِّفُوهُمْ ،فَلُدِغَ سَيِّدُ ذَلِكَ الحَيِّ ،فَسَعَوْا لَهُ بِكُلِّ شَيْءٍ لاَيَنْفَعُهُ شَيْءٌ ،فَقَالَ بَعْضُهُمْ : لَوْ أَتَيْتُمْ هَؤُلاَءِ الرَّهْطَ الَّذِينَ نَزَلُوا ،لَعَلَّهُ أَنْ يَكُونَ عِنْدَ بَعْضِهِمْ شَيْءٌ ،فَأَتَوْهُمْ ،فَقَالُوا : يَا أَيُّهَا الرَّهْطُ إِنَّ سَيِّدَنَا لُدِغَ ،وَسَعَيْنَا لَهُ بِكُلِّ شَيْءٍ لاَ يَنْفَعُهُ ،فَهَلْ عِنْدَ أَحَدٍ مِنْكُمْ مِنْ شَيْءٍ ؟ فَقَالَ بَعْضُهُمْ: نَعَمْ ،وَاللَّهِ إِنِّي لَأَرْقِي ،وَلَكِنْ وَاللَّهِ لَقَدِ اسْتَضَفْنَاكُمْ فَلَمْ تُضَيِّفُونَا ،فَمَا أَنَا بِرَاقٍ لَكُمْ حَتَّى تَجْعَلُوا لَنَا جُعْلًا ،فَصَالَحُوهُمْ عَلَى قَطِيعٍ مِنَ الغَنَمِ ،فَانْطَلَقَ يَتْفِلُ عَلَيْهِ ،وَيَقْرَأُ : ( الحَمْدُلِلَّهِ رَبِّ العَالَمِينَ ) فَكَأَنَّمَا نُشِطَ مِنْ عِقَالٍ ،فَانْطَلَقَ يَمْشِي وَمَا بِهِ قَلَبَةٌ ،قَالَ: فَأَوْفَوْهُمْ جُعْلَهُمُ الَّذِي صَالَحُوهُمْ عَلَيْهِ ،فَقَالَ بَعْضُهُمْ : اقْسِمُوا ،فَقَالَ الَّذِي رَقَى : لاَ تَفْعَلُوا حَتَّى نَأْتِيَ النَّبِيَّ صَلَّى اللهُ عَلَيْهِ وَسَلَّمَ فَنَذْكُرَ لَهُ الَّذِي كَانَ ،فَنَنْظُرَ مَا يَأْمُرُنَا ،فَقَدِمُوا عَلَى رَسُولِ اللَّهِ صَلَّى اللهُ عَلَيْهِ وَسَلَّمَ فَذَكَرُوا لَهُ ،فَقَالَ: «وَمَا يُدْرِيكَ أَنَّهَا رُقْيَةٌ ؟ »، ثُمَّ قَالَ : «قَدْ أَصَبْتُمْ ،اقْسِمُوا ،وَاضْرِبُوا لِي مَعَكُمْ سَهْمًا » فَضَحِكَ رَسُولُ اللَّهِ صَلَّى اللهُ عَلَيْهِ وَسَلَّمَ .

د أبو سعید الخدري رضی الله عنه نه روایت دی چې وايي:
د رسول الله صلی الله علیه وسلم یوه ډله صحابه په سفر لاړل، هغوی د عربو یوې قبیلې سره پړاو واچوه، صحابه کرامو وغوښتل چې دغه قبیله د دوی مېلمستیا وکړي، خو هغې قبیلې انکار وکړ او دوی يې میلمانه نه کړل ، د دغه قبیلې مشر مار وچيچه د قبیلې غړو د هغه هر رقم علاج وکړ، مګر د هغوی دغه علاج هېڅ فائده ونه کړه. د قبیلې یو کس وویل: که دغه کسانو ته ورشئ چې هغوی دلته پړاؤ اچولی كېدای شي د هغوی سره څه وي، هغوی د صحابه‌و رضی الله عنهم ځاى ته راغلل او ورته يې وویل:

ای خلکو! زمونږ د قبیلې مشر مار چيچلى دی مونږ ډېر کوشش وکړ خو هېڅ فائده يې ونه کړه په تاسو كې کوم کس څه لري؟ یو صحابي رضی الله عنه وویل: هو! په خدای قسم! زه دم کوم، مونږ ستاسو نه مېلمستیا وغوښته خو تاسو انکار وکړ تر هغې به زه دم ونه کړم تر څو چې تاسو ماته عوض را نه کړئ هغوی، هغه ته د اوزو د رمې ورکولو وړاندیز وکړ هغه صحابي په هغه کس باندې د فاتحې سورت لوسته او دم يې پری اچوه تر دې چې ښه شو. داسې ښکارېده لکه چا چې د تړلو څخه خلاص کړی وی هغوی چې د صحابې سره کومه وعده کړې وه هغه يې ورکړه.

په صحابه‌و رضی الله عنهم كې یو کس وویل: راځئ چې دا اوزې په خپلو كې تقسیم کړو، کوم صحابي چې دم اچولى و هغه وویل: صبر وکړئ تر څو رسول الله علیه افضل الصلاة والسلام ته ورشو او هغه ته ټوله كيسه ووایو، چې هغه څه حکم كوي؟!

کله چې هغوی رسول الله علیه الصلاة والسلام په خدمت كې حاضر شول ټوله كيسه يې ورته وکړه، رسول الله علیه الصلاة والسلام ورته وفرمایل: ته څنګه پوه شوې چې په دې (د فاتحې سورت) سره دم كېږي. بیا هغه علیه افضل الصلاة والسلام وفرمایل: تاسو ښه وکړل هغه تقسیم کړی او زما برخه هم په كې وکړئ. بیا رسول الله علیه افضل الصلاة والسلام مبارک وخندل.

د حدیث تخریج :
صحيح البخاري واللفظ له: کتاب الإجارة ، باب مایعطى فى الرقیة علی أحیاء العرب بفاتحة الکتاب حدیث: (۲۲۷۶ ) او په کتاب الطب ، باب : الرقى بفاتحة الکتاب، (۵۷۳۶)او په باب : النفث فى الرقیة كې ( ۵۷۳۷) هم راغلی او همداسې په کتاب : فضائل القرآن ، باب : فضل فاتحة الکتاب (۵۰۰۶)
صحيح مسلم: کتاب السلام، باب جواز أخذ الأجرة علی الرقیة بالقرآن و الأذکار، حدیث: (۲۲۰۱)
سنن الترمذى: أبواب الطب عن رسول الله صلی الله علیه وسلم، باب ما جاء فى أخذ الأجر علی التعویذ، حدیث: (۲۰۶۳ )
سنن أبى داود: کتاب الاجارة، باب قى کسب الأطباء، حدیث: (۳۴۱۸)
سنن ابن ماجه: أبواب التجارات، باب أجر الراقى، حدیث:( ۲۱۵۶ )

د حدیث فائدې:
۱: که چېرته به چا د صحابه کرامو سره بد وکړل، نو هغوی رضی الله عنهم به ورسره ښه کول.
۲: په سورة فاتحې سره د زهر لرونكي شیانو دم كېږی.
۳: قرآن کریم كې د هر مرض علاج شته. الله عزوجل فرمایلی:(وننزل من القرآن ماهو شفاء و رحمة للمؤمنین)
۴: صحابه رضی الله عنهم به د حرامو شیانو څخه سخته وېره کوله او ځان به يې ترینه ډېر په احتیاط ساته لکه دغه كيسه كې صحابه کرامو د هغه اوزو د تقسیم خبره وکړه او بل صحابي ورته وویل: چې تر څو رسول الله علیه الصلاة والسلام ته نه یو ورغلي او د هغه نه مو پوښتنه نه وي کړي دا کار مه كوئ.
۵: د یو چا په دمولو سره د دم پیسې اخیستی شی.

ــــــــــــــــــــــــــــــــــــــــــــــ

د رسول الله عليه افضل الصلاة والسلام په ژبه ديرش قيصي
ليکوال : عصام عبدالعزيز الشايع
ژباړه او د احاديثو تخريج : عبد الباري (جمال)

Afghan School Textbooks

Advertisement | Why Ads? | Advertise here

پوهنتون چینل

پوهنتون چینل درسره سبسکرایب او شریک کړئ

سبسکرایب Subscribe


Editorial Team

د واسع ویب د لیکوالۍ او خپرونکي ټیم لخوا. که مطالب مو خوښ شوي وي، له نورو سره یې هم شریکه کړئ. تاسو هم کولی شئ خپلې لیکنې د خپرولو لپاره موږ ته راولېږئ. #مننه_چې_یاستئ

خپل نظر مو دلته ولیکئ

wasiclinic.com
Back to top button
واسع ویب