کشمش چې له انګورو څخه جوړیږي، او په هېواد کې د انګورو باغونه په یو شمېر ولایتونو لکه غزني، زابل، کندهار، هرات، او کابل کې په لوړه پيمانه شتون لري، د افغانستان په اقتصاد کې مهم رول لوبوي.

په هېواد کې باغوانان په ساده شکل انګور په خاصو جوړو شویو خونو کې چې (کشمش خانې) ورته ویل کیږي، په لرګیو ځړوي چې د یوې میاشتې مودې څخه وروسته په کشمشو بدلیږي، او هغه انګور چې په کشمش خانو کې په لرګیو نه ځړول کیږي یعنې دانه شوي وي، د بامونو پر سر اچوي، چې په کشمش خانه کې (شنه ممیز) یا کشمش او د بامونو په سر ووڅکي یا (سره ممیز) منځ ته راځي.

دغه کشمش که په ډېر ساده ډول د کلیوالو خلکو له لورې بازارونو ته تیاریږي، خو که یې په اړه د پوهانو نظریه واخلو نو ډېره ارزښتمنده مېوه ده.

انګور خوړلو سره د ډیرو ناروغیو مخه ونیسئ:

الله (جل جلاله) په نړۍ کې انسان له داسې نعمتونو سره نازولی چې له ښه خوند سربیره بې شميره روغتیايي ګټې هم لري او کولی شي انسان له مختلفو ناروغیو وژغوري او یا هم د مختلفو ناروغیو مخه ونیسي.

د الله (جل جلاله) دغو نعمتونو له جملې څخه یو هم انګور دي چې دغه میوه له ځانګړي خوند لرلو سربیره د ډیرو ناروغیو مخنیوي او یا هم د ډیرو ناروغیو له منځه وړلو لپاره تر ټولو غوره درمل دی.

په انګور کې نورو ډیرو ګټو سربیره ویټامین اې (A)، سی (C)، کلسیم (Calcium)، اوسپنه (Iron) او پوتاشیم (Potassium) شتون لري کوم چې انساني روغتیا لپاره بې شمیرې ګټې لري.

د انګور له استعمال سره د ساه بندۍ ناروغي له منځه ځي چې له دې سربیره د هډوکو په پیاوړي کولو کې هم خاص ارزښت او اهمیت لري او کولی شي د انسان هډوکي پیاوړي او غښتلي کړي.

دغه میوه کې زیاته اندازه انټي اکسیډنټ شتون لري کوم چې انسان د لویو کولمو له ناروغۍ، سرطان، زړه ناروغۍ، عصبي ناروغیو او الزایمر له ناروغیو څخه په ژغورلو کې مرسته کوي.

همدا راز په انګورو کې شته اوسپنه، مس (Copper) او مګنیزیم انسان کې د وینې له کمښت څخه ژغوري او په بدن کې د وینې کمښت پوره کولو کې ډیر ګټور دی چې له دې سربیره د هاضمې سیستم په پیاوړي کولو کې هم خاص اثر لري.

انګور ځینې ځانګړي خواص لرلو سره د سرطان په څیر خطرناکې ناروغۍ مخه نیسي او په بدن کې د دې ناروغۍ په خلاف مقاومت پیدا کوي او سرطان تولیدونکي حجراتو مخه ونیسي.

یوې څیړنې ثابته کړې چې د انګور اوبه ورځېنۍ استعمال په انسان کې د سینې سرطان مخه نیسي چې له دې سربیره د سرطان نورو ډیرو ډولونو څخه هم مخنیوی کوي.

د کشمش (ممیز) روعتیایي ګټې:

د روغتیايي پوهانو له نظره، کشمش د وېټامین ډي ښه منبع ده. د غاښونو د حفاظت او د ژامو د قوي کولو لپاره ډېر فایدمند دي.
کشمش د تشویش په ختمولو کې مهم رول لوبوي.

په امریکا کې د روغتیایي چارو پوهان وايي، چې کشمش د سرطان د ناروغۍ څخه ساتنه کوي، او اعصابو ته تقویت ور په برخه کوي.
د کشمش یو بل مهم خاصیت دا دی، که غوښې ته ور اضافه کړی شي، نو د خوړو چربي ور سره کمیږي، فایبر او اوسپنه زیاتوي او د سودیم اندازه کموي.
دغه خوږه مېوه د بدن د رګونو په صحیح ډول حرکت کولو کې ښه مرسته کوي.

د سترګو ډاکټران وايي چې کشمش د سترګو د نظر په ساتنه کې ښه مرسته کوي، او د سرو ممیزو زیات خوراک د هغه چا لپاره ښه دي، چې شبکوري لري.

د زړه ماهرین په دې اند دي، که د چا د بدن اوبه زیاتېږي، نو له کشمشو څخه دې استفاده کوي، ځکه چې کشمش د بدن د اضافه اوبو په له منځه وړلو کې کارنده رول لوبولی شي.