ډاكټر اسرار احمد

د پاکستان هيواد مشهور دیني عالم او د تنظیم اسلامي پاکستان بنسټ ایښودونکی.
ډاکتراسرار احمد ۷۸ کاله عمر درلود او د پاکستان د جماعت اسلامي د لومړنیو غړيوڅخه ؤ خو په کال 1957 کې د مولانا مودودي سره په ځینو مسایلو کې د اختلاف له امله د جماعت نه جدا شو او په انفرادي توګه يې د دعوت رجوع الی القران تر سرلیک لاندې دعوتي چارې پر مخ بیولې تر دې چی په کال 1971 م میلادې كې يې د مولانا مودودی رح د وفات نه وروسته د تنظیم اسلامي په نوم یو جماعت تشکیل کړ او له دې لاری به يې دعوتی چارو ته دوام ورکولو .

نوموړى د مروج سیاسي نظام او انتخاباتو سخت مخالف ؤ او دا به يې د شریعت خلاف ګاڼه او په زغرده به یې ویل چې له دې لارې هیڅکله بدلون نشي راتلای نو ځکه يې پکې برخه نه اخیسته بلکه د اسلامی نظام او خلافت د اعادې لپاره يې د درس، تدریس او تربیتي حلقاتو له لارې کار کولو.

نوموړي د قرآنی ښووني د عامولو په موخه د پاکستان په مختلفو ښارونو کې د انجمن خدام القرآن او قرآن اکادمي په نوم ادارې جوړې کړې وې او له دې لارې به يې خلکو ته خپل پیغام رساوه.
ډاکتراسرار احمد د رسنیو له لاری هم خپل دعوت پر مخ بیولو چی د ندای خلافت، میثاق او حکمت قرآن برسیره نورې ډیرې خپرونی هم لري او وخت په وخت د لوستونکو لاس ته رسي.
ډاکتر اسرار احمد د هند د مشهور مبلغ ډاکتر ‌ذاکر نایک سره نږدې اړیکې درلودې او د هغه د تلویزیوني چینل (پیس) نه به يې همیش تقریرونه او درسونه نشریدل. د پیس چینل نه پرته د کیو تلویزیونی چینل نه به هم د ده درسونه وړاندې کیدل چې وروسته د یوې دسیسې له مخې بند شو.
ډاکتر اسرار احمد دا اراده هم لرله چی د خپلو دعوتی پروګرامونو لپاره یو تلویزیوني چینل پیل کړي خو حکومت اجازه نه ورکوله .

ډاکتر صیب په 1954م کې د لاهور د ایډورډ کالج د طب له رشتې نه فارغ او په کال 1965م کې يې د کراچۍ پوهنتون نه په اسلامیاتو کې ماستری لاس ته راوړه . نوموړي د اسلامي ارزښتونو او دعوت په اړه له سلونه زیات کتابونه ليكلي. د نوموړی مرګ د اسلامي امت لپاره لویه ضایعه ده، الله تعالی دې د دعوت په لار کې د نوموړي خدمات قبول کړي او په فردوس جنت کې دې ځای ورکړي.

شكرالله مخلص