په شپږمه میاشت د زیږون سره دښځې نفاس شته؟
پوښتنه:
كه چيرې د يوې ښځې ماشوم د حمل په شپږمه مياشت پيدا شي، نو د دې ميرمنې نفاس څرنګه حسابيږي؟ آيا هغه درى مياشتې موده چې دا ماشوم وړاندې تولد شوى دى د نفاس په موده كې څه اغيز نه لري؟ ته كومې مودې د دغې ښځې سره كورواله كول حرام دي؟
ځواب
مفتي: مولوي محمد امان رسولي
ډېر ښاغليه !
عليكم السلام و رحمة الله و برکاته
د نفاس پر مهال له خپلې مېرمنې سره کوروالی (جماع) ناروا ده، د نفاس زياتره موده څلوېښت ورځې ده، او د اکثره علماؤ همدا نظر دی. نو ښځه به څلوېښت ورځې انتظار کوي، مګر هغه مهال چې پاکوالی وويني كه څه هم تر څلويښتو ورځو وړاندې وي.
جنين که د شپږو مياشتو وزيږيږي او يا زيان (سقط) شي نو تر دې وروسته نفاس حسابېږي، او د نفاس همغه حکم دی، چې مخکې بیان شو، هيله ده چې تسلي مو شوي وي.
