عبادت او حکمت
ليکنه: مصطفی محمود
ژباړه: ډاکټر غنچه ګل ارمان
الله تعالی مونږ ته د عبادت امر د دې له پاره کړی چې هغه پوهيږي چې په دې کې زمونږ ژوند دی، يوازې د مجبورونې او د أوامرو د تپنې له پاره يې نه دی کړی.
الله تعالی شراب (خمر) او نور نشه يي توکي ځکه حرام کړي چې د انسان په تاوان دي.
جواري او قمار يې ځکه حرام کړي چې د تاوان، کينې او دُښمنيو لامل کيږي.
زنا يې ځکه حرامه کړې چې زنا ګډوډي ده، نسبونه پکې ګډوډيږي او نفسونه پکې د شهواتو او د هوی او هوس او غريزو په وړاندې ماتې خوري.
واده يې ځکه حلال کړی چې په واده کې نظم او نظام، مسؤليت پيژندل او د زړه ډاډ دی.
د خنزير غوښه يې ځکه حرامه کړې چې خنزير د انفلونزا وايروس او د کدودانې چينجي کوربه دی. د خنزير د غوښې پروټينونه تر ټولو سخت او پيچلي پروټينونه دي او د زړه د سختوالي سبب کيږي.
که چېرې د هوسۍ، سوی، آس، اوښ، چرګې، او خره په څېر وښو خوړونکو حيواناتو ته وګورو، و به مومو چې ټول آرام او سوله ايز حيونات دي.
مګر که څيروونکو، پړانګ، زمري، ګيدړ، باز، ګوربتې او نورو غوښه خوړونکو حيواناتو ته وګورو، په ټولو کې د سختوالي، وحشت او جګړه مارتوب ځانګړتياوې شته.
په دې کې هم شک نه شته چې د زياتې غوښې خوړنې او په بدن کې د ځينو ځانګړو صفاتو، لکه سخت زړيتوب، ځيږوالي، او جديت د رامينځ ته کېدلو تر مينځ اړيکه شته.
څرنګه چې د خنزير غوښه تر ټولو سخته غوښه او د تر ټولو پېچلو حيواني پروټينونو لرونکې ده، کېدی شي زيان يې هم د نورو غوښو په پرتله زيات وي.
خدای پوهيږي مونږ نه پوهيږو. الله تعالی د کُلي او هراړخيز علم لرونکی دی، هغه خپل اوامر بې سببه نه دي وضع کړي.
الله تعالی دا شریعت، د حرامو حراموالی او د حلالو حلالوالی له انسان سره د محبت او مينې له پاره رالېږلی.
~~~~~~~~~~
د دکتور مصطفی محمود له (القرآن .. محاولة لفهم عصري) کتاب څخه. دکتور مصطفی محمود (۲۷ دسمبر ۱۹۲۱- ۳۱ اکتوبر ۲۰۰۹م) مصری طبيب، فيلسوف او وتلی ليکوال وو.
