سهارنۍ په ماشومانو کې د نوښت ځواک پياوړی کوي
هغه ماشومان چې په منظم ډول سهارنۍ خوري، تر نورو نوښتګر وي. څېړنو ښودلې، که ماشومان په منظم ډول سهارنۍ وخوري، په لوی عمر کې له ګڼو ناروغیو لکه شکر، چاغۍ او نورو څخه ژغورل کېږي.
روغتیاپالان میندو او پلرونو ته سپارښتنه کوي، چې د خپلو ماشومانو په سهارنۍ کې دې هرو مرو پروټین او کاربوهایډرېټ ور زيات کړي؛ ځکه دغه چاره په وینه کې د شکرې اندازه د څو ساعتونو لپاره لوړه ساتي او ماشومان ژر نه وږي کېږي.
څېړونکي دغه راز وایي، هغه ماشومان چې سهارنۍ نه خوري او یا یې هم په سهارنۍ کې پروټین او کاربوهایډرېټ شتون ونه لري، تر ډېره د سر او نس په درد اخته کېږي او د زده کړې توانایي هم له لاسه ورکوي.
روغتیاپالان وایي، که سهارنۍ هېڅ ونه خوړل شي، کېدای شي ماشومان له ګڼو روغتیایي ستونزو سره مخ شي او پر وده یې منفي اغېز وکړي. دوی وایي که ماشومانو ته په منظم ډول سهارنۍ ورکړل شي، ماشوم وده کوي او په څنګ کې یې ورسره د نوښت او ذکاوت قوه هم پیاوړې کېږي او ذهن یې هم وده کوي. هغوی ټولو میندو او پلرونو ته سپارښتنه کوي چې د خپلو ماشومانو خیال وساتي او خوړو ته یې پاملرنه وکړي.
ژباړه: حمیدالله حمیدي
