ذاکر نایک؛ د دیني مناظرو ستوری او تبلیغ ګر

ذاکر نایک خپله لومړنۍ مناظره په ۱۹۹۴م کال کې د بنګالي لیکوالې تسلیما نسرین سره ترسره کړه. د مناظرې موضوع د اسلام مفهوم و، چې د هغې په کتاب “Lajja” کې مطرح شوی و. دا مناظره له څلورو ساعتونو زیاته دوام وکړه، چې څلور خبریالانو یې څارنه او ارزونه کوله.

په ۲۰۰۰م کال کې یې د وخت له مشهورو مناظرو څخه یوه د آیرلنډي پروفیسور او د کیمیا متخصص ویلیام کامبل سره وکړه. د دې مناظرې موضوع “قرآن او انجیل د علم په رڼا کې” وه، چې پکې ذاکر نایک د قرآنکریم او انجیل له آیتونو داسې شواهد وړاندې کړل چې مقابل لوری یې حیران کړ. دا مناظره د نایک لپاره لویه بریا وه، چې ورسره یې پلویان زیات شول، او نه یوازې په اسلامي نړۍ کې، بلکې په لوېدیځ کې یې هم شهرت وموند.

ذاکر نایک تر ۴۰۰۰ زیاتې ویناوې او مناظرې په بېلابېلو هېوادونو او وچو کې وړاندې کړي، له هند څخه تر ګامبیا، له اسټرالیا څخه تر امریکا پورې. د هغه متواضع شخصیت، جذاب اسلوب، او مؤدبانه دعوت د خلکو زړونه جلب کړي. د هغه د دعوت له امله ډېر کسان مسلمان شوي، او نور د اسلام په اړه سوچ ته مجبور شوي.

د ذاکر نایک دا چټک شهرت مسیحي او بودایي سازمانونه وډار کړل، ځکه چې دوی یې د خپلو عقایدو او تبلیغاتو لپاره یو خطر وباله. د هند محکمې په بمبئي ښار کې د هغه د نیولو امر صادر کړ او د پیسو مینځلو او ترهګرۍ تورونه یې ورباندې ولګول. د هند حکومت حتی له انټرپول نړیوال پولیس وغوښتل چې ذاکر نایک ونیسي او هند ته یې وسپاري.

خو دا تورونه بې‌اساسه او سیاسي انګېزې لري، ځکه چې د ذاکر نایک ټولې ویناوې ثبت شوې دي، او هغه تل د منطقي استدلال، متوازن تفکر، او احترام لرونکي مناظرې له لارې خپل دیني پیغام وړاندې کوي. هغه د مخالفینو د عقایدو کمزورې نقطې له مذهبي متونو څخه په واضح ډول ثابتوي، نو ځکه د مسیحیانو او بودایانو مذهبي مشرانو هڅه وکړه چې د هغه فعالیتونه بند کړي.

خو دوی به هېڅکله پدې هڅه کې بریالي نه شي، ځکه چې حق تل روښانه وي، او خلک تل حقیقت ته لیواله وي.