د سر درد یو له عامو ناروغیو څخه دی چې ۸۵ سلنه په بدن کې اوبو د کموالي له امله رامنځ ته کیږي. ځینې نور عوامل هم شته کوم چې په انسان کې د سر درد لامل ګرځي.

دلته مو له هغو خوړو سره اشنا کوو کوم چې د سر درد له منځه وړلو کې ډیره زیاته مرسته کوي او لږه موده کې اثر کوي:

۱- لږ غوړ لرونکی شیدې: څنګه چې مو مخکې هم یادونه وکړه د سر درد یو له سترو عواملو څخه په بدن کې د اوبو کموالی دی نو له همدې امله مایعات او سودیم لرونکي خواړه د بدن د اړتیا وړ اوبه پوره کولو سره د سر درد له منځه وړي. شیدې نه یوازې دا چې د اوبو کموالی له منځه وړي بلکه زیات شمیر منرالونه لکه کلسیم او پوتاشیم هم لري کوم چې بدن له مختلفو ناروغیو څخه ژغورلی شي. شیدې له نورو ډیرو ګټو سربیره د وینې لوړ فشار او شکر ناروغۍ لپاره ډیره ګټه لري او انسان له ذهني فشار او خفګان څخه ژغوري. خو باید کوښښ وشي چې لږ غوړ لرونکی شیدې استعمال شي.

۲- خټکی: دغه خواړه هم زیاته اندازه پوتاشیم او اوبه لري کوم چې په بدن کې د سودیم او اوبو د کموالی مخه نیسي. یوه درمیانه خټکی ۶۶ ملی ګرامه مګنیزیم لري کوم چې د بدن ۱۶ سلنه اړتیا پوره کولی شي. په وینه کې د شکر کموالی هم د سر درد لامل ګرځي خو مګنیزیم لرونکي خواړه د وینې شکر اندازه نورمال ساتلو سره سر درد له منځه وړي.

۳- کبان: د سر درد له منځه وړلو لپاره ویټامین بي ۶ (B6)، بي ۱۲ (B12) او فولک اسید (Folic Acid) ډیره زیاته ګټه لري او له همدې امله د سر درد له منځه وړلو لپاره ټونا (Tuna) او سالمن (Salmon) نومې کبان ډیره زیاته ګټه لري. یوازې سالمن نومې کب ستاسې د بدن ۲۵۰ سلنه د ویټامین بي ۱۲ اړتیا پوره کولی شي په دې معني چې یو کوچنی سالمن کب هم کولی شي ستاسې سر درد له منځه یوسي.

۴- کچالو: کچالو هم زیاته اندازه پوتاشیم لري او کولی شي د بدن ۳۵ سلنه د پوتاشیم اړتیا د یوې ورځې لپاره پوره کړي. کچالو خاصه اندازه ویټامین اې (A)، سي (C) او بي ۶ (B6) هم لري.

۵- اوبه: څنګه چې مخکې مو هم یادونه وکړه ۸۵ سلنه د سر درد په بدن کې اوبو د کموالي له امله رامنځ ته کیږي. د سر درد څخه خلاصون لپاره زیاته اندازه اوبه استعمال کړئ.