په نویو طبي څېړنو کې څرګنده شوې، هغه ماشومان چې په ورځ کې تر دوه ساعته زیات تلویزون ته کيني، د هغو ماشومانو په پرتله زيات د وينې په لوړ فشار اخته کېدای شي، چې تلويزون ته ډېر نه کيني.

په دغه څېړنه کې ویل شوي، چې په ورځ کې تر دوه ساعته زیات د تلویزون مخته د ماشوم ناسته هغه تر نورو هغو ماشومانو چي تلویزون دومره وخت نه ګوري، ۳۰ سلنه زیات د وينې لوړ فشار له ناروغۍ سره مخ کولای شي او زیاتوي چې د ماشومانو د بدني ورزش کمښت هم په هغوی کې د ویني د لوړ فشار ناروغي ۵۰ سلنه زیاته وي.

دغه څېړنه په تېرو دوو کلونو کې په پرلپسې توګه د اوروپا په ۸ هیوادونو کې په ۵۲۲۱ ماشومانو تر سره شوې ده.

د څېړونکو په وینا د ماشومانو د ویني فشار په غټوالي کې د نورو لویو ناروغیو لامل هم کیدای شي. د ساري په توګه د زړه د والونو بندیدل، دماغي سکته، او د زړه تر اپریشنه هم ناروغي غځیدای شي.

په دې څیړنه کې ویل شوي چې د هر ۱۰۰۰ ماشومانو څخه ۱۱۰ یې د ویني د لوړ فشار په ناروغي اخته وه.