ترخه خواړه مو فشار ټېټوي
مرچ یا ترخه خواړه نه یوازې د انسان له سترګو اوښکې بهوي، بلکي د بدن دنني نظام باندې هم اغېزه کوي.
د چین په پلازمېنه بیجنګ ښار کې ډاکترانو د یوې څېړنې په پایله کې موندلې،چې د تیزو او توندو مرچو څخه تیار شوي خواړه د انسان د وینې د لوړ فشار د را ټېټولو وړتیا لري.
د څېړونکو په وینا،په مرچو کې داسې مواد شته دي، چې د وینې رګونه معتدل او عادي کوي او د وینې جریان پکې تېزوي.
دوی زیاتوي، چې د لوړ فشار د ناروغانو لپاره د ترخو خوړو خوړل، د زیان پر ځای ګټه لري.
باید پام مو وي، چې په څېړنه کې هغه خواړه ښودل شوي، چې د شنو یا سرو مرچو اندازه پکې زیاته وي، نه دا چې زموږ د اکثرو کورنیو په څېر خام مرچ وخورئ، بلکي لومړنیو طبي څېړنو په ډاګه کړې، چې خام شنه مرچ، په ځانګړې توګه د مرچو په منځ کې زړي د معدې لپاره سخت تاوان لري.
