سیرت النبي متن

نبوي سیرت (۱) ـ د عبدالله او آمنې واده او د رسول الله ﷺ زیږېدنه

 

د عبدالله او آمنې واده او د رسول الله ﷺ زیږېدنه:

عبدالله خپل پلار عبدالمطلب ته تر ټولو زامنو ډېر خوښ وو، نو هغه ته يې د وهب بن عبد مناف بن زهره بن کلاب لور واده کړه. پدغه وخت کې د عبدالله عمر ۱۸ کاله وو، او آمنه پدغه وخت کې د نسب او مقام له مخې د قریشو د غوره مېرمنو څخه وه.[۱]

رسول الله (صلی الله علیه وسلم) لا نه وو پیدا چې پلار يې وفات شو، عبدالله شام ته د تجارت په موخه تللی وو چې بېرته د راستنېدو په وخت په مدینه منوره کې ومړ او د ماماګانو سره یوځای په مدینه منوره کې خښ کړای شو[۲]، د عبدالله بن عبد المطلب د وفات په وخت ټول عمر پنځه ويشت (۲۵) کاله وو[۳]، د هغه څخه په  میراث کې د (۵) اوښانو ، لږ شمېر ګډو بیزو او یوه وینځه (برکه) څخه نور څه پاتې نه شول.[۴]

رسول الله (صلی الله علیه وسلم) د دوشنبې په سهار ، د ربیع الاول د میاشتې په دولسمه ورځ، (چې د ۵۷۱ زېږېز کال د اپریل د میاشتې ۲۲مې نېټې سره سمون خوري)، او همداراز د فیل د مشهورې پېښې څخه نږدې پنځوس (۵۰) ورځې وروسته دې نړۍ ته سترګې وغړولې[۵].

کله چې رسول الله (صلی علیه وسلم) پیدا شو؛ مور يې نیکه ته یو تن واستاوه ترڅو د لمسي د زیږېدو زیری پرې وکړي، د هغه (صلی الله علیه وسلم) نیکه عبدالمطلب د ده په زېږېدو ډېر خوښ شو، عبدالمطلب راغی، خپل لمسی یې په یوه ټوټه کې ونغاړه ، بیت الله ته يې راووست، د الله تعالی حمد او ثنا یې بیان کړه او د محمد په سپیڅلې نوم يې ونوماوه.

دا چې د محمد نوم مخکې په عربو کې مشهور نه وو پدې کې هم د الله تعالی یو لوی حکمت نغښتی وو، الله تعالی خپله هغه اراده سر ته رسوله چې په پخواني آسماني کتابونو کې يې د هغه یادونه کړې وه؛ دا وو چې الله رب العزت د عبدالمطلب په زړه کې د محمد نوم اچوي او عبدالمطلب هغه (صلی الله علیه وسلم) محمد نوموي[۶].

د رسول الله ﷺ د زېږېدو په اړه د حسان بن ثابت سپیناوی:

حسان بن ثابت (رضي الله عنه) فرمايي: يقينا زه غښتلی وم نږدې د اوو اتو کالو وم، هر څه مې چې اورېده پرې پوهېدم، په یثرب کې يو يهودي چې د کلا (قعلې) د پورته برخې څخه چیغې وهلې دا مې ترې واورېده: ای د یهودو ټولیه! كله چې د یهودو ټولی ور نږدې شو؛ نو ویې ویل: هلاك شې مونږ ته څه وایې؟ هغوی ته یې ویل: نن شپه د احمد ستوری را ختلى دى، هغه چې پیغمبر کېږي به.[۷]

د رسول الله ﷺ د زېږېدنې په وخت د هغه کرامات او د پیغمبرۍ ځینې نښې نښانې:

دا چې الله تعالی خپل استازی د یو لوی امر لپاره پیداکوي هغه دا چې خلک د یو الله رب العزت بنده ګۍ ته رابلي او د خلکو له بنده ګۍ څخه يې منع کوي؛ نو د هغې تربیت او حفاظت يې د وړکتوب څخه کولو او د هغې کرامات او د نبوت نښي نښاني يې خلکو ته د هغه له وړکتوبه ورښوولې؛ چې یو څه ترې لاندې بیانوو:

۱- د رسول الله (صلی الله علیه وسلم) مور آمنه وايي: ما د رسول الله (صلی الله علیه وسلم) د حمل موده ډېره آسانه او عادي تېره کړې ده، تر دې چې ما د دې احساس نه کاوه چې زه حامله یم! حال دا دی چې د نورو مېرمنو د حمل موده ډېره سخته وي.[۸]

۲- مور یې وايې: ما د ده د زيږېدو په وخت یو خوب ولید چې یوه داسې رڼا راڅخه ووتله ، نوموړي رڼا دومره زیاته وه چې د شام ماڼۍ ګانې يې راته ښکاره کړلې .[۹]

۳- د زېږېدو په وخت يې له مور سره یوه مرستندویه مېرمن  (د عثمان بن ابي العاص مور) وايې: د رسول الله (صلی الله علیه وسلم) د زېږېدنې په وخت په کوټه کې یوه رڼا پیدا شوه چې ټوله کوټه يې رڼا کړه، او د آسمان ستوري داسې را نږدې کېدل؛ ما دا ګومان کولو چې دغه ستوري کوټې ته دننه ننوځي.[۱۰]

۴- د فارسیانو (اوسني ایران) د زر (۱۰۰۰) کاله راهیسې هغه نه مړ کېدونکی اور چې دوی ورته عبادت کولو، د ده (صلی الله علیه وسلم) د زېږېدنې په شپه هغه اور مړ شو.

۵- د زېږېدو په وخت د فارس پر امپراتورۍ یوه داسې شدیده زلزله راغله چې له امله يې د پاچايۍ د ماڼۍ ۱۴ کوټې رانسکورې شوې، د همدې شدیدي زلزلې په ترڅ کې د هغوی عبادت خاني هم د خاورو سره خاوري شوې.[۱۱] [۱] – سيرة ابن اسحاق جـ ۱ صـ ۴۲

[۲] – نور اليقين في سيرة سيد المرسلين صـ ۹

[۳] – البداية والنهاية لابن كثير جـ ۲ صـ۳۲۲

[۴]  – السيرة النبوية على ضوء القرآن والسنة جـ۱ صـ ۱۶۶، وحياة النبي صلى الله عليه وسلم صـ ۷۸

[۵]  – البداية والنهاية جـ ۲ صـ ۳۱۹ – ۳۲۱ و نور اليقين في سيرة سيدة المرسلين صـ۹٫

[۶] – البداية والنهاية لابن كثير جـ۲ صـ ۳۲۴ و نور اليقين في سيرة سيد المرسلين صـ ۱۰

[۷] – سيرة ابن اسحاق جـ۱ صـ ۸۴

[۸] – البداية والنهاية جـ ۲ صـ ۳۲۳

[۹] – مخکنی مصدر

[۱۰] – البداية والنهاية جـ ۲ صـ ۳۲۴

[۱۱] – مخكنى مصىر صـ ۳۲۷ – ۳۲۸٫

عماد الدين سعيد

Tags

wasiweb.com

wasiweb.com Publisher Team publish your sent articles. you can send your articles to publish, also you can be author with us. Share the website and articles with your friends

خپل نظر مو دلته ولیکئ

Back to top button
error:
Close
Close