روغتیايي زیانونهروغتیايي لارښوونېماشومانو ناروغۍ

د شېرخوارو ماشومانو اسهال

زیاتره شېدې رودونکي ماشومان په اسهال اخته کېږي او مېندي نه پوهېږي چي څه ډول دخپل واړه ماشوم درملنه وکړي، مونږ لومړی باید ددې اسهال لاملومنه وپلټو او د اسهال ډولونه وپېژنو او د ماشوم له عمر سره سم د هغه دستونزي حل لاري وپلټو او درملنه يې وکړو.

اسهال څه ته وايي؟

زیاتره ناوي مېندي د خپل ماشوم له اسهال څخه بېځایه وار خطا کېږي او دنه تجربې په اساس سرچپه چلند خپلوي، په کار دا ده چي مور دماشوم مزاج درک کړي، که د هغه اسهال اوبه وي او رنګ يې له طبيعي غولو څخه بدل وي او په ورځ کي څو څو ځلي وي که قی او تبه ورسره وي نو دېته د کولمو نزله وايي چي باید سمدلاسه د ماشومانو متخصص ډاکټر ته مراجعه وشي او دهغه له هدایاتو سره سم چلند وشي.

او که يې غول نرم وي خو رنګ يې طبيعي وي او له عادت سره سم يې په ورځ کي یو یا دوه او یا درې ځلي کوي او اضافي عوارض لکه قی او تبه ونه لري نو بیا دکومي وارخطايي خبره نده او ماشوم روغ بلل کېږي.

دشيدو رودونکي ماشوم د اسهال لاملونه څه دي؟

د شېر خوارو ماشومانو اسهال دوه ډولونه لري

يو هغه ډول اسهال دی چي دبکتېریا (جراثیمو) وایرسونو چي د ککړ خوراک او څښاک له کبله ماشوم ته ورپېښېږي.

دوهم هغه اسهال دی چي د بدهضمي، د خوراک د حساسیت او یا دیخ موسم او یا هم د غاښونو دزېږېدلو په وخت کي ماشوم ورباندي اخته کېږي.

اسهال ولي خطرناک وي؟

د اسهال له کبله د ماشوم په جسم کي اوبه کمېږي چي د هغه وزن کموي او په جسم کي يې معدنیات او ضروري هغه مالګېن مواد له منځه وړي چي دهغه دجسم دجوړښت په سسټم کي حياتي رول لري.

مونږ دماشوم داسهال په وخت کي څه باید وکړو؟

مور بايد خپل ماشوم ته خپلي پئ (شيدې) ورکړي او داسهال په وخت کي کله هم مصنوعي او یا نوري بهرنۍ شيدې ورنکړي او هڅه وکړي څو په ورځ کي څو څو ځلي ماشوم ته خپلي شیدې ورکړي که یې بیا هم اسهال ونه درېږي او څو ورځي دوام وکړي بیا باید د ډاکټر له مشورې سره سم د اوبو د کمښت جوړ شوی محلول چي په درملتونو کي وي ورته ورکړي او یا يې هم په کور کي ورته جوړ کړي.

هغه جوشک چي مونږ ماشوم ته پکي عادتاً مائعات او یا نرم شیان ورکوو او دغاښونو دتولېد په وخت کي هغه پلاستېکي ربړونه چي ماشوم خولې ورباندي لګوې هر سهار باید دلسو دقیقو لپاره په اوبو کي واېشول شي.

هغه وچ جوشک چي عادتا يې افغاني مېرمني خپلو ماشومانو ته په غاړه کي وراچوي او خپل ماشوم پې کراروي باید دتل لپاره دهغه څخه لېري وساتي.

دکورني محلول دجوړولو چل :

په یو ګلاس اېشېدلو اوبو کي دي يوه وړه قاچوغه مالګه او یوه قاچوغه بوره واچوي او چي په اوبو کي يې حل کړي بیا دې ماشوم ته په قاچوغه په ورځ کي څو څو ځله له څه فاصلې وروسته ورکوي او اقلاً په ورځ کي همدا يو ګلاس ورباندي ختم کړي او هره ورځ باید تازه محلول ورته جوړ کړي.

دشېدو رودونکي ماشوم مور پخپله باید څه وخوري او ماشوم ته کوم خواړه باید ورکړي؟

مور باید پدې خبره وي چي که هغه خپل ماشوم ته خپلي پئ ورکوي دهغې هر خوراک دهغې تر شپږو میاشتو په کم ماشوم مستقیمه اغېزه کوي دا ځکه چي ماشوم پخپله غذاء کي دمور له شيدو استفاده کوي مور باید پدې وخت کي هغه خواړه وخوري چي ماشوم ته ځور نه پېښوي همدا راز باید مور کېلې، مڼې او ګازري دخپل خوراک لویه ونډه وګرزوي.

او که يې ماشوم تر شپږو میاشتو پورته وي او بهرنی خوراک هم کولای شي باید دکېلې جوس ورته جوړ کړي سېب په اوبو کي ورته پوخ کړي نرمي ورېځي ورته پخې کړي او دا ټول شيان ورته په مکسر کي جوس کړي او یو څه مستې هم ورته پې ګډي کړي دا مرکب د ماشوم خېټه فعاله ساتي جسم ته يې ګټه رسوي او دهغه داسهال مخه نيسي.

مور باید دهغو خوراکونو او مېوه جاتو له خوړولو ډډه وکړي چي هغه يې ددې په فکر ماشوم ته زيان اړوي او یا يې هم په قبض، اسهال او یا بد هضمي اخته کوي.

donate

خپل نظر مو دلته ولیکئ

Back to top button
error: