کور د انسان لپاره یو لوی نعمت دی
قال الله تعالی (وَ اللهُ جَعَلَ لَکُم مِن بُیُوتِکُم سَکَنًا ) الآیه.
کور د انسان لپاره یو لوی نعمت دی
رب العالمین جل جلاله کورونه د انسان د سکونت زریعه ګرزولي دي چې له هرڅه نه پکې انسان پناه اخلي، په کورونو کی د انسان ستر او پرته ساتلې وي.
په ځانګړې ډول کور د ښځي د پردي او ستر ځای دی. رب العالمین جل جلاله فرمايي ( وَقَرنَ فِي بُیُوتِکُنَّ وَلَاتَبَرَّجنَ تَبَرُّجَ الجَاهِلِیَّةِ الاُولَی ) (الاحزاب:۳۳)
ژباړه: او پاتې شئ ای ښځو! په کورونو خپلو کې او مه ښکاره کوئ ښایست خپل، بیګانه انسانانو ته، په شان د ښایست د ړومبنیو (د جاهلیت د زمانې د) ښځو.
له کورونوڅخه هر ډول ګټه اخستل کېږي: مثلاً: کور د انسان د خوراک او څښاک ځای دی، کور د انسان د نکاح ځای دی، کور د انسان د خوب او راحت ځای دی، همدارنګه کور له خپلی کورنۍ او اولاد سره د خلوت او اجتماع ځای ده.
کله چې د هغو انسانانو په حال فکر وکړو چې کورونه نه لري بیا د کور اهمیت راته معلومېږي. لکه: هغه در په دره مسلمانان چې کورونه نه لري د فقر او غربت له امله هسې سایبان پسې ګرزي او شپې پکې سبا کوي، یا چې د هغه درپه دره مجاهد حال وپوښتو چې اضطراري حالاتو کې يې د شپې ځای معلوم نه وي کله د چا په کور کې شپه کوي، هغه هم که څوک ځای ورکړي، کله غره او کله هم چرته د شنه اسمان لاندي په سړه هوا کي شپی سبا کوي چي نه بستره لري نه بله داسې وسیله چې له یخ او ګرمۍ څخه ځان پرې وساتي. یا د هغو پوډریانو په حال فکر وکړو چي په پیاده روونو کې د لارو په سر، د پلونو لاندې ، په ډیران وغیره.. ځایونو کې په بد حال خیرن او خچن پراته وي بیا به د کور قدر راته معلوم شي.
لنډه دا چې کور د الله جل جلاله یو لوی نعمت دی، د نوموړي نعمت شکر په کار دی او اصلاح يې لازمي ده، هله به مونږ د نوموړي نعمت شکر ادا کړی وي چي د خپلي کورنۍ د اصلاح فکر راسره وي.
البته د کور د اصلاح لپاره څو امور دي چې انسان د کورنۍ اصلاح ته مجبوروي که دې امورو ته نظر وکړو بیا د کورنۍ په اصلاح کي کوشش کولی شو:
اول: د خپل ځان او کورنۍ ساتل د جهنم له اور څخه، د رب العالمین جل جلاله حکم دی چې فرمايي: ( یَا أَیُّهَا الَّذِینَ آمَنُو قُوا أَنفُسَکُم وَاَهلِیکُم نَاراً ) [سورة التحريم ۹].
ژباړه: ای ایمان والا وو خپل ځان او کور نۍ د جهنم له اور څخه بچ کړئ.
دوهم: هغه لوی مسؤولیت دی چې انسان ته رب العالمین جل جلاله ور په غاړه کړی دی، چې هغه د کو رپالنه ده لکه چې حضرت انس رضي الله عنه روایت کړی ( اِنَّ اللهَ سَائلُ کلَّ راعٍ عما استرعاه الحدیث ( النسائي :۹۱۲۹)
ژباړه: یقینا الله جل جلاله له هر پالونکي څخه د هغه چا په اړه پوښتنه کوي چې پالنه يې ور سپارلې ده.
دریم: کور د هر قسم شر او فتني څخه د ځان ساتني يوه بهترينه زریعه ده. رسول الله صلي الله عليه وسلم فرمايلي دي: «سلامة الرجل من الفتنة أن یلزم بیته». (الجامع الصغیر:۵۹۶۲)
ژباړه : له فتنو څخه د انسان بچ کیدل په دې کې دي چي په خپل کور کې پاتې شي.
څلورم: انسان په اکثرو اوقاتو کې خپل ژوند په کور کي تیروي، لکه په سخته ګرمۍ کې په ډیره یخنۍ کې، د باران په وخت کې، د شپې لخوا او د ورځې اولنۍ شېبې، همدارنګه د ورځې آخرنۍ حصه، له کارو بار او تدریس څخه د فراغت په وخت کي له دې امله په کار ده چې هسې وخت په کور کې تېر نه شي په ذکر او عباداتو باندې تېر شي.
پنځم او مهم امر: هغه دا ده چې د کورنۍ د اصلاح له امله د اسلامي جامعې اصلاح راتلای شي ځکه کورونه د اسلامي جامعې لپاره د خښتو مثال لري نو که زمونږ کورونو کې اصلاح وه د کورونو د اصلاح له امله به په ټوله جامعه کې اصلاح راشي.
پورته مهمو مسؤولیتونو ته په کتو سره غواړم چې د کورونو د اصلاح په مورد کي په مختلفو برخو څه ليکنې وکړم. لکه:
۱ـ د ښې ښځې انتخاب
۲ـ د ښځې په اصلاح کې کوشش کول.
۳ـ کور د ذکر ځای وګرزوي.
۴ـ له خپلو کورونو څخه مسجد جوړ کړئ.
۵ـ د خپلی کورنۍ ایماني تربیه.
۵ـ د کورنۍ تعلیم.
همدارنګه غواړم د ۳۰ نصیحتونو په شمول ځينې مسائل وليکم، او په سلسله وار ډول يې لوستونکو ته وړاندې کړم، هیله لرم چې د مسلمانې کورنۍ لپاره ګټور تمام شي.
لیکوال: مولوي حمد الله آخونزاده
