ښځه د سړي جنت ته د تګ سبب
رسول اکرم صلى الله عليه وسلم فرمایلي دي: هرهغه څوک چې د خپلو دوه لوڼو ښه پالنه وکړي او د بلوغ تر وخته پورې یې هر راز روا غوښتنې پر ځای کړي نو هغه به د قیامت په ورځ داسې وي لکه (بیا یې خپلو دواړو گوتو ته اشاره وکړه چې یو ځای یې نیولې وې. او هرهغه څوک چې د خپلو لوڼو له امله له کومې ستونزې سره مخ شي او سره له هغې بیا هم د هغوی ښه پالنه وکړي نو د قیامت په ورځ به د نوموړي کس او د دوزخ د اور ترمنځ یو دېوال د پردې په شان واقع شي او د هغه نه به حفاظت کوي.
همدارنگه رسول اکرم صلى الله عليه وسلم د نارینه وو په باره کې داسې فرمایلي دي: غوره شى چې په دې دنیا کې الله تعالی نارینه وو ته ورکړي دي هغه نېک عمله او صالحه ښځه ده.
هو، همدا ښځه ده چې د خپلو اولادونو په ښه توگه روزنه کوي او وروسته له الله جل جلاله او د هغه له رسول صلى الله عليه وسلم څخه په اوله درجه کې د احترام او اکرام وړ ده. یو نفر له رسول الله صلى الله عليه وسلم څخه وپوښتل چې د خدمت لپاره تر ټولو وړ کس څوک دى؟ رسول صلى الله عليه وسلم ورته وفرمایل: مور. بیا هغه کس وویل: بیا څوک دي؟ ورته وویل شول: مور. بیا هغه کس وویل: بیا څوک دي؟ ورته وویل شول: مور. په څلورم ځل ورته وویل شول چې پلار.
