د پلازمېنې کابل په ګډون د هېواد په زیاترو ولایتونو کې یو شمېر تفریحي پارکونه د افغان دولت ښاروالیو او خصوصي سکتور لخوا جوړ شوې دي، دغه پارکونو که څه هم د خلکو نفوس په پرتله په نشت برابر دي خو بیاهم یو څه د خلکو تنده پرې ماتېږي.
څو ورځی مخکي له خپلو کوچنیو ماشومانو سره چلستون باغ ته تللي وم دغه باغ په دې وروستیو کې د دولت لخوا رغول شوې چې ډېره زیاته خواري پرې شوي او په هر لحاظ د خلکو لیدلو لپاره مناسب ځای دي خو په خلکو کې د ښاري فرهنګ د نشتوالي له امله د باغ مسولینو ته څو برابره کارونه زیات کړي.
چېرته چې خوراکي توکي استعمال کړي همالته یې پاتې شونې په خپل ځای پرېږدي حال داچې د باغ په مختلفو برخو او څنډو کې د خځلو ټېمونه یې کېښودل شوې ترڅو د خوراکي توکو پاتې شونې هلته واچول شي.

نو ددې لپاره باید افغان دولت د خلکو د عامه پوهاوې لپاره یو څه په لویو لارو ، جادو، او عامه ځایونو کې لوی او غټ بنرونه جوړ کړي ترڅو خلک تشویق شي ترڅو خپل پاتې شونې په مناسبو ځایونو کې واچوي.

په دغه کار سره له یوې خوا د ککړتیا مخنیوي کېږي او له بلې خوا خلک د مختلفو امراضو له ستونزو څخه ژغورل کېږي ځکه همدا اوس په کابل کې هوا ډېره ککړه ده او د خلکو ژوند یې له تهدیدونو سره مخ کړي نو دغه تفریحي پارکونه د کوچنیو ماشومانو د ساعتریو لپاره یو په زړه پورې ځایونه دي ترڅو هلته ماشومان په خلاص مټ او په پاک او ښکلي چاپېریال کې لوبې وکړي.

خان ولي کامران