کلونه پخوا مخکې له دې چې په نړۍ کې لوی کتابپلورنځي او همدارنګه د امازون په شان انلاین کتابپلورنځي جوړ شي، ګرځنده کتابتونونه دود ول.

ګرځنده کتابتونونو به د خلکو کورونو ته کتابونه رسول او همدارنګه به یې خلکو ته بلنه ورکوله چې دوی ته ځان ورسوي او کتابونه ورته وښیي.

د دوی داسې ماموریت وو چې چاپ شوي اثار به یې له ځان سره هغو سیمو ته وړل چې له ښاره به لرې وو، او هلته به  کتابپلورنځي موجود نه وو.

 په هغه سیمو کې به یې د خلکو دروازې ورټکولې او خپل ګرځنده کتابپلورنځي ته به یې رابلل.

لومړی ګرځنده کتابتون په 1850 کال د انګلیستان په وارینګتن سیمه کې جوړ شو. دغه کتابتون پر یوه اس  ګرځول کېده چې په یو کال ( 12 میاشتو ) کې یې وکولای شول تر 12 زره ټوکه کتابونه امانت ورکړي.

 وروسته دغه کتابتون په یو ماشین ډوله موټر کې ځای پر ځای شو.

دې کتابتون د شلمې پېړۍ په لومړیو کلونو کې د خلکو په ذهن کې خورا ښه ځای پیدا کړ او مینوال یې خورا زیات شول.

دغه ګرځنده کتابتون اوس هم په هغه سیمه کې شته، خو اوس په خورا ښه تګنالوژۍ کار ته دوام ورکوي.

حامد حقمل