د نشیي توکو له قاچاق او تجارت څخه په ترلاسه شويو پيسو يې واده کړی، آيا نكاح يې درسته ده؟
كه چېرته یو شخص د نشیي توکو له قاچاق او تجارت يا نورو لارو څخه چې د اسلام دين منع کړي وي؛ پيسې ترلاسه کړي وروسته په هماغه پيسو خپل زوي يا ورور ته ښځه وکړي؛ آيا د هغوی نکاح کېږي يا نه؟
الحمد لله والصلاة والسلام على رسول الله، أما بعد،،
په دې کې شک نشته چې هغه شتمني او پيسې چې د نشیي توکو له قاچاق او تجارت څخه يا له نورو نامشروع لارو څخه ترلاسه شوي وي حرامې دي او مسلمان ته جايز نه دي چې له دې حرامو څخه د واده، نکاح، خوراک څښاک او د ژوند د نورو آسانتياوو لپاره مصرف وکړي؛ بلكه فورا دې توبه وکړي.
که د بل چا مال وي او په ظلم، غصب او زور يې اخيستی وي بايد هغه خپل مالک ته وسپاري او که مالک يې معلوم نه وي او يا دا چې د حرام تجارت پيسې وي نو هغه دې د توبې او خلاصون په نيت په بې وزلو وويشي.
اما که چېرته يې په همدې پيسو د واده مصارف ادا کړي او د مېرمنې مهر ورکړی وي واده او نکاح يې سمه او درسته ده(په هغه صورت کې چې د نکاح ټول شرايط او ارکان تطبيق شوي وي) او دا حرام مال د نکاح په صحت کومه اغېزه نه لري؛ ليکن په هر صورت دا شخص ګنهګار ګڼل کېږي او بايد توبه وکړي.
