د خيټې ګيس او پړسوب ولې پيدا کيږي؟!
له اندازې زیات او یا هم په ډیره چټکۍ سره خواړه خوړل په خیټې کې د پړسوب او ګیس لامل ګرځي. یو شمیر خواړه هم شتون لري چې خوړل يي دغه ستونزه زیاتوي. دلته مو له هغو خوړو سره چې د دغې ستونزې لامل ګرځي اشنا کوو.
مصنوعي خواږه:
هغه کسان چې له مصنوعي خواږه یا ساړه مشروبات سره مینه لري باید دغې ستونزې لپاره تیار وي. دغه ډول خواږه په وړو کولمو کې نه جذبیږي او لویو کولمو ته رسیږي چیرې چې د بکتریا د شتون له امله خپریږي او په خیټه کې د ګیس د پیدا کیدو لامل ګرځي. همداراز زیاته اندازه بوره هم په معدې کې مضر بکتریا زیاتوي چې د ګیس د پیدا کیدو لامل ګرځي.
ګلپي او ډولونه يي:
ګلپي، کرم او یو شمیر نور سبزیجات د سرطان په وړاندې مقاومت پیدا کوونکو موادو له غوره منابعو څخه ګڼل کیږي خو په دغو سبزیجاتو کې شته نشایستې هضم ډیر ستونزمن دی او په غټو کولمو کې د میتین ګیس شکل غوره کوي. خو د دې مطلب دا نه دی چې دغه سبزیجات به ونه خوړل شي بلکه باید کوښښ وشي په ټاکلی اندازه وخوړل شي. د لیمو اوبه د دغو سبزیجاتو په چټک هضم کې ډیره زیاته مرسته کولی شي.
ځانګړی درمل:
د پړسوب ضد درمل لکه د پښتورګو د درد کموونکي ګولۍ کولمې له یو شمیر ستونزو سره مخ کوي چې په پایله کې د خیټې د پړسوب لامل ګرځي. که چیرې ستونزه دا وي نو له خپل ډاکټر سره مشوره وکړئ تر څو ستاسې درمل بدل کړي.
انررژي لرونکې مشروبات:
ځینې خلک له ورزش څخه وروسته انرژي لروونکي مشروبات استعمالوي چې په دغو مشروباتو کې شته بوره او خواږه مواد د خیټې د پړسوب لامل ګرځي. د دغو مشروبات پر ځای له ورزش څخه وروسته کیله او یا اوبه استعمال کړئ.
