نړۍ په دې ورځ

په ٢٠٠٤ زېږديز کال کې د نړۍ ځيني مهمې پېښې

په ٢٠٠٤ م کال کې ځينو پېښو ته ځغلنده کتنه

پوهيږو چې د تاريخ په اوږدو کښي هر کال  ډير څه نوي پيښيږي ، ډير څه منځ ته راځي او ډير څه د منځ ځي.په ٢٠٠٤ کال کښي هم ډير څه  پېښ شوي دي چې د ټولو يادونه به يې ګرانه وي. خوځينو مهمو ته يې په لنډه توګه اشاره کوو:

  • د جنورۍ په مياشت کښي د مارس اکسپريس په نوم اروپاي فضايي بيړۍ د لومړي ځل لپاره د  مارس په سياره کښي د اوبو د شته والي خبر ورکړ. دغه اوبه د يخ په څېر د مارس په جنوبي برخه  کښي کشف شوي .  په دې خبره پوهانو، ډېره خوښي ښکاره کړي او ويلي : څنګه چې اوبه د ژوند لپاره اړيني دي نو  په دې کشف سره دا امکان  شته چې په مارس کښي هم يو وخت ژوند پيل  شي.

 

  •  د فبرورۍ په مياشت کښي په مراکش کښي زوره وره زلزله وشوه  چې په هغې کښي ٦٠٠ کسانوخپل  ژوند د لاسه ورکړي و. دا زلزله د ايمزورن په ښار کښي ترنورو ښارونو شديده وه چې ډير کورونه او ودانۍ يې د منځه يو وړې. د زلزلې شدت د رختر شپږ درجې ښودل شوي و.

 

  • د مارچ په ١١ نېټه د هسپانيې په پلازمېنه مادريد کښي د هغه ښار تر ټولو لويه چاودنه وشوه چې ١٩٩ کسان په کښي مړه او ١٥٠٠ په کښي ژوبل شول. دغه چاودنې د مادريد په لسو اورګاډو کښي وشوې چې د ترورزم په  هکله انديښنې يې نه يواځې په هسپانيه بلکې په ټولې اروپا کښي لانوري هم زياتې کړي.  د دې چاودنو سره سم  ١١ مليونو هسپانويانو مظا هره وکړه چې د هسپانيې په تاريخ کښي تر ټولو لويه  وه.

 

  • د اپرېل په مياشت کښي د عراق دفلوجې په ښار کښي څلور امرېکايې پوځيان په يو موټر کښي وه وژل شول او بيا مړه وسوزول شول. په دغو څلورو کسانو کښي درې دبحري  ځواکونو د ځانګړي کنډک غړي و او څلورم يې د مځکنيو ځواکونو پخوانې کماندو  و. د دوي وژنې په تلويزيونونو کښي وښوول شوي او په نړۍ کښي پري ډير بحثونه پيل شول.
  • د مې په مياشت کښي ١١٤ کلنه هالنډۍ ښځه چې ايګليشيه جورډن نوميده ، د عمر له پلوه  د نړۍ تر ټولوزوړ او مشر انسان وبلل شو.
  • د جون په مياشت کښي د امرېکي پخوانې ولسمشر رونالد ريګن د ٩٣ کالو په عمر ومړ. ريګن د  ١٩٨١ کال نه تر ١٩٨٩ کاله  د متحده ايالاتونو څلويښتم ولسمشر و.
  • دجولاي په ١٧ نېټه  د هند په يوه  ښاري  ښوونځې کښي اور لږيدلي و چې ٨٧ ماشومان په کښي مړه شوي و. ددغو ماشومانوعمر د شپږو او ديارلسو کالو په  منځ کښي و.
  • د اګست په ١٣ نېټه د اتن په ښارکښي داولمپيک نړيوالي  لوبي پيل شوي او په ٢٩ نېټه پاي  ته ورسيدلي.
  • د سپتمبر په لومړۍ نېټه د روسيې په  جنوبي ښار بيسلان کښي يو ښوونځې د لسګونو ساعتونو لپاره د چيچن ديو شمېر بېلتون غوښتونکو له خوا يرغمل ونيول شو او د يوي پوځي مخامختيا په ترڅ کښي ٣٣٤ تنه ووژل شول چې ډيري يې ماشومان و.
  • داکتوبر په ٩ نېټه په افغانستان کښي د لومړي ځل لپاره د ولسمشرۍ  ټولټاکنې د خلکو په پراخ ګډون او بې مثاله شور او زوږ سره تر سره شوي. په ټولټاکنو کښي د افغان ښځوپراخ ګډون د ځانګړي يادونې وړ دي. د نومبر په درېمه نېټه د راي شمېرنې کميسيون په رسمې توګه اعلان وکړ چې د ټولو رايو پنځه پنځوس عشاريه څلور سلنې حامد کرزي ګټلي. او د اساسي قانون له مخې د هيواد جمهورريس بلل کيږي.
  •  د نومبر په ٢ نيټه  د هالنډ په امستردام کښي هالنډی فلم جوړونکې تېيو فان ګوګ په رڼا ورځ  په  ګوليو وويشتل شو ، اود دې لپاره  چې هغه  ژوندې پاتې نه شي نو وژونکي هغه څو ځايه په چاړه هم  وواهه . پوليسو وژونکی چې محمد ب نوم لري و نيوه. محمد ب  يو مراکشی  مسلمان ځوان دي چې په هالنډ کښي زېږيدلی   عمريې ٢٦ کاله دی او هالنډي او مراکشي  تابعيت لري.  محمد ب د تېيو فان ګوګ د وژلو سبب اسلام ته  سپکاوي  او په يوه فلم کښي د يوې نجلۍ پر لڅ بدن باندي  د قرآن دآيتونو ليکل ښودلي و . ددې پيښې سره سم په ټول هالنډ کښي د تروريزم سيورې خپور شواو په هالنډ کښي د اوسيدونکو مسلمانانو او هالنډيانو تر منځ د بې باوري فضا را منځ ته شوه.
  • د نومبر په ١١ نېټه  د فرانسې د پاريس د نظامی روغتون وياند اعلان وکړ چه د فلسطين ملی مشر  ياسر عرفات د سهار په درو نيم بجو وفات شوچې عمر يی ٧٥ کاله و.
  • د نومبر په ١٢ نېټه د افغانستان د پوهې او ادب ځلانده ستورې  فاضل استاد علامه پوهاند رشاد د کابل په څلورسوه بيستريز روغتون کې خپله سپيڅلې اروا لوي خالق ته وسپارله .
  • د دسمبر په ٢٦ نېټه د هندد سمندرپه اوبو کښي  يوه سخته زلزلې پېښه شوه چې ټکانونه يې تر افريقا هم ورسيدل. خو زيات شدت يې په آسيايې برخه کښي و. د تر لاسه شوو مالوماتو له مخې تر اوسه په  شپږوساحلي هيوادونو کې نژدې ٨٠٠٠٠ کسان مړه شوي  اودغه  شمېره ورځ په ورځه ډېريږي. دغه زلزلې په هند ، اندونيزيا ، مالديپ ، سرې لنکا ، ماليزيا او تايلينډ کې زياتې ويجاړۍ پېښي کړي او ستر انساني ناورېن  يې را منځ ته کړى دى .

کوچۍ  ( هالنډ )

donate

wasiweb.com

wasiweb.com Publisher Team publish your sent articles. you can send your articles to publish, also you can be author with us. Share the website and articles with your friends

خپل نظر مو دلته ولیکئ

Back to top button
error: