اسلام مشاهیراسلامي معلومات

انور سادات- نوبل ګټونکي مسلمان پوهان

انور سادات

انور سادات د مصر درېیم ولسمشر دی، چې د ۱۹۷۰م کال د اکتوبر له ۱۵مې نیټې بیا د خپل مرګ تر ورځې د ۱۹۸۱ د اکتوبر ۶نیټې پورې د دغه هیواد ولسمشر پاته شوی. نوموړي د خپلې واکمنۍ پر مهال په مصر کې د سیاسي ګوندونو ایجادو او تاسیس ته په اجازه ورکولو سره د جمال عبدالناصر د واکمنۍ د پېر سیاسي او اقتصادي محدودیتونه له منځه یوړل.

انور سادات په ۱۹۷۰م کال کې د مصر یوه لویه برخه خاوره د اسرائیلي اشغالګرو څخه ازاده کړه. له اسرائیلو نه همدې د ازادۍ احساس هغه ته د خلکو په زړونو کې ځای ورکړ. خو وروسته ډېر ژر  د اسرائیل او مصر تر منځ د سولې کولو ته متوجه شو او په دې لړ کې يې زیاتې هڅې او کوښښونه وکول. که څه د اسرائیلو سره د سولې او تفاهم د رامنځته کولو له کبله انور سادات د عرب لیګ له غړیتوب څخه وایستل شو ؛خو ده ته د مصر او اسرائیلو تر منځ د سوله يېزو اړیکو او امن پر سر د نوبل د سولې جایزه ورکړل شوه.

انور سادات د ابو الکم المانفع  په یوه غریبه کورنۍ کې له مصري پلار او سوډانۍ مور څخه وزیږېد. نوموړی ماشومتوب له خپلې انا سره تېر کړ، هغې به ورته ماشومتوب کې لا د انګریزانو کیسې کولې.

د ښاغلي انور سادات په اړه ویل کېدل، چې په ژوند کې له څلورو کسانو ډېر زیات متاثره و، لومړی تن ذاهران و، چې د بریتانوي ښکېلاک پر وړاندې يې مبارزه کوله او په پای کې د انګریزانو له لورې  اعدام کړای شو، دوهم کس کمال اتاترک ،دریم ماتما ګاندي او څلورم د خوښي وړ شخصیت يې هټلر و .

انور سادات د جمال عبدالناصر د واکمنۍ پر مهال په ۱۹۵۴م کال کې صدراعظم او له ۱۹۶۰م نه تر ۱۹۶۸م کال پورې د مرستیال ولسمشر څوکۍ سنبالولې.یو کال وروسته بیا هم د مرستیال ولسمشر په توګه غوره شو.

د انور سادات د واکمنۍ په وخت کې د مصر د پخواني ملګري امریکا په سپارښتنه د اسرائیلو او مصر ترمنځ د کیمپ ډيویډ تړون لاسلیک شو. په ۱۹۷۰م کال کې واک ته د انور سادات په رسولو کې د جمال عبدالناصر پلویانو له نوموړي سره ډېره مرسته وکړه. واک ته له رسیدو وروسته انور سادات د یوه ځيرک او هوښیار سیاستوال په توګه تبارز وکړ، د هیواد په مذهبي او غیر مذهبي کړیو کې یې ځان مطرح کړ .

انور سادات لومړنی عرب ولسمشر  و، چې په ۱۹۷۷م کال کې د نومبر په ۲۰مه نېټه  یې اسرائیل ته رسمي سفر وکړ. د اسرائیلو لومړي وزیر مینجیم بیګن د نوموړي تود هرکلی وکړ او ډاډ يې ورکړ، چې د مصر او اسرائیل د سولې په تړاو به د ملګرو ملتونو په مرسته یوه حل لاره را وباسي. دوی دواړو د ۱۹۷۹م د مارچ په ۲۶نېټه د امریکا پلازمینې واشنګټن ډي سي ته ګډ سفر وکړ او هلته یې پر یوه تړون لاسلیک هم وکړ. ورو ورو د غبرګو هیوادونو د چارواکو ترمنځ د رسمي ناستو او ملاقاتونو لړۍ وغځېده. د یادونې وړ ده، چې په دې لړ کې د امریکا ولسمشر جیمي کارټر هم زیات رول لوبولی دی.

د مصر او اسرائیل ترمنځ د سولې او امن د راوستلو لپاره د کوښښونو او مبارزې  له کبله انور سادات او بینجیم بیګن د ۱۹۸۱م کال د نوبل د سولې جایزې ته ونومول شول او جایزه ورکړل شوه.

د مصر او اسرائیلو ترمنځ د سادات د هڅو په پایله کې د شویو تړونونو وروسته د دواړو هیوادونو ترمنځ سمندري لارې خلاصي شوې، تګ راتګ پيل شو او یو لړ نورې اسانتیاوې هم رامنځته شوې. خو له دې هم سترګې نشي پټېډای، چې د انور سادات دې هڅو د اسلامي نړۍ د اسلامپالو او ملتپالو کړیو په منځ کې سخت حساسیتونه او غوسې هم را وپارولې.

ژباړه او لنډیز: فرید احمد وحید

صافی بنسټ خبرتیا Safi Foundation Ads Donation

wasiweb.com

wasiweb.com Publisher Team publish your sent articles. you can send your articles to publish, also you can be author with us. Share the website and articles with your friends

خپل نظر مو دلته ولیکئ

Back to top button
وسیع ویب
error: