په بریتانیا کې د پوستکي سرطان پېښې ولې په ډېرېدو دي؟
د بریتانیا د سرطان څېړنه وړاندوینه کوي چې سږکال به ددغه سرطان ۲۰،۸۰۰ ثبت شوي پېښې تشخیص شي – چې د ۲۰۲۲ او ۲۰۲۲ کلونو ترمنځ کلنی اوسط یې ۱۹،۳۰۰ و.
د دې تحلیل ښیي چې په هرو ۱۰۰،۰۰۰ خلکو کې له ۲۱ څخه تر ۲۸ پېښو پورې د ۲۰۰۹ او ۲۰۱۹ کلونو ترمنځ دا کچه نژدې درېیمه برخه لوړه شوې ده.
د تشخیص زیاتوالی تر یوې اندازې د مخ په زیاتېدونکي عمر لرونکي نفوس او د پوستکي سرطان نښو په اړه د پوهاوي زیاتوالي له امله دی.
راپور وړاندیز کوي چې هر کال شاوخوا ۱۷،۰۰۰ میلانوما پېښې د مخنیويوړ دي – په ۱۰ کې شاوخوا نهه یې د ډېرو الټرا وایلیټ (UV) وړانګو له امله رامنځته کېږي.
Melanomas یا میلانوما د پوستکي سرطان یو جدي ډول دی چې کولی شي د بدن نورو برخو ته خپور شي.
د غیر میلانوما پوستکي سرطانونه هم شته، چې په عمومي توګه ډېر عام دي او معمولاً د میلانوما پرتله لږ جدي دي.
د بریتانیا د سرطان څېړنې (CRUK) په وینا، د پېښو زیاتوالی د عمر ټول پاړکي پوښلي، خو تر ټولو لوی زیاتوالی د ډېر عمر طبقه کې دی – په ځانګړي توګه له ۸۰ کلونو د لوړ عمر په انسانانو کې چې تشخیص د یوې لسیزې په اوږدو کې په هرو ۱۰۰،۰۰۰ خلکو کې له ۶۱ څخه ۹۶ ته لوړ شوی.
د خیریه موسسې د تحلیل له مخې، د ۲۵ او ۴۹ کلونو ترمنځ عمر لرونکو لویانو کې هم زیاتوالی راغلی.
د دې ډلې لپاره دا کچه په ۱۰ کلونو کې په هر ۱۰۰،۰۰۰ خلکو کې له ۱۴ څخه ۱۵ ته لوړه شوې ده.
ساینسپوهان وړاندیز کوي چې ځوانان د بوډاګانو یا یو نسل مخکې خلکو پرتله د UV او پوټکي سرطان ترمنځ د اړیکې په ډېر شاید خبر وي.
دا په دې معنی کېدی شي چې دوی ډېر احتمال لري چې د زړو خلکو پرتله په لمر کې احتیاطي تدابیر ونیسي؛ ځکه چې زاړه کسان د لمر د وړانګو د خطرونو په اړه لږ پوهېدل.
څېړونکي وايي ډېری خلکو د رخصتیو له هغو ارزانه کڅوړو هم ګټه پورته کړه، چې په ۱۹۶۰ کې پیل شوې وې.
“زه هېڅکله د لمر وړانګو ته نه پاتېدم، خو سوځېدلې یم”
د شروسبري د ۵۷ کلنې کیرولین جونز په ۲۰۱۸ کې وروسته له هغه د پوستکي سرطان تشخیص شو چې د هغې په پښه کې یوه کوچنۍ زخه ولیدل شوه.
هغې بيبيسي ته وویل: “دا کوچنۍ او ځلېدونکې وه چې په منځ کې توربخنه وه. دا سمه نه ښکارېده.
“وېروونکې خبره دا ده چې که دا زما په شا کې وای، شاید ما به نه وای لیدلې، خو دا چې ما ولیده او ژر ډاکټر ته لاړم، نن هم دلته یم. “
د کیرولین میلانوما په لومړیو کې تشخیص شوې وه او د هغې د لرې کولو لپاره له جراحي وروسته، هغه اوس له سرطان څخه پاکه ده.
“زه هېڅکله د لمر وړانګو ته ډېره نه یم پاتې شوې، خو هر ځل چې زه بهر ته تللې یم ډېره بد سوځېدلې یم. دا شاید د څو ساعتونو لپاره په لمر کې د ویده کیدو پنځه ځله وي. “
“هیله لرم زما کیسه به خلک وهڅوي کله چې له لمر خوند اخلي، د خپلو عادتونو په اړه فکر او پاملرنه وکړي. “
د CRUK اجراییوي مشره میشل میچل وايي چې د میلانوما په شمول د سرطانونو څخه ژوندي پاتې کېدل د ښه کېدو په حال کې دي، “د پام وړ پرمختګ ښیي چې د څېړنې لخوا ممکن شوی”.
مګر دا حیاتي ده چې خلک هڅه وکړي په لومړي ځای کې د ناروغۍ خطر کم کړي.
“ځانونه ډاډمن کړئ چې په لمر کې پر ځان پام وکړئ او له خپل معالج ډاکټر یا GP سره اړیکه ونیسئ، که تاسو په خپل پوټکي کې کوم غیر معمولي بدلونونه وګورئ – که یو نوی یا بدلېدونکی خټکی، زخم چې نه رغېږي، یا ستاسو د پوستکي ساحه چې عادي ښکاري .په وخت کې د سرطان پېژندل کولی شي ټول توپیر رامنځته کړي. “
په بریتانیا کې د میلانوما د پوستکي له سرطان سره تشخیص شوي په ۱۰ لویانو کې نژدې نهه به یې د ۱۰ کلونو یا ډېرو لپاره له ناروغۍ سره ژوندي پاتې شي.
له لمر د خوندیتوب لارښوونې:
- د سهار له ۱۱ بجو څخه تر ۳ بجو پورې په سیوري کې پاتې شئ
- هېڅکله ځان په لمر مه سوځوئ
- په مناسبو جامو ځان پټ کړئ (یوه لویه پیکداره خولۍ او اوږده لاسماغوګان) او د لمر عینکې
- پر ماشومانو اضافي پاملرنه وکړئ
- لږ تر لږه فکتور – 30 سنسکرین په منظمه توګه وکاروئ
- په منظم ډول د لمرضد هغه کرېم وکاروئ چې ۳۰ فکټور ولري
