ستا هر یو قول مې د ژوند د تجربو په رقم
زه به ستا لار تعقیبوم کړو وعـدو په رقم

هره خبره چې رایاده کړم پیغام دی پکې
تکراروم یې د مُـلا د مسئلو په رقم

بغیر له ربه که بل چا ته سجده روا وی
زه پنځه وخته درتلم تاته جمـاتو په رقم

پلاره داستا پندونو زه د ژوندانه جوګه کړم
پرې مې عمل دی د قران د سپارو په رقم

لکه چې څنګه اسماعیل د ابرهیم ومنل
زه به تابع یم سـتا د امر هــغو په رقم

خدای خبر کله به د ژوند لپــاره ساه تازه کړو
مونږه شپې ورځې تیروو دلته د مړو په رقم

که څوک د ګلو ګیډۍ راوړي تماشه یې کوو
ستاپه بیلتون کې راته ښکاري د اغزو په رقم

عادله ذاته ته یې قبر له انوارو ډک کـړې
جنت یې ځای کړې مقبره یې کړې باغچو په رقم

نسیم شاه عادل