د مناسب خوب او غوره یاداښت اړیکه څه ده؟
ساینسپوهانو هغه سیسټم موندلی، چې له لارې یې د شپې مهاله خوب د انسان یاداښت زیاتولو کې مرسته کوي. چین او امریکا کې ساینسپوهان د لوړ معیار مایکروسکوپي ( یو ډول معاینات) کارولې، چې پکې یې د انساني دماغ د ژوڼکو تر منځ اړیکي موندلي، چې وايي د خوب په حال کې جوړیږي.
د دواړو ډلو موندنې په ساینس ژورنال کې خپرې شوې دي، چې پکې ویل شوي، د خوب کموالي له کبله سخته روزنه هم ضایع کېږي. ماهرین وايي، دا خورا مهمه څېړنه ده، چې له مخې یې د حافظې سیسټم پټ رازونه افشا شوي دي.
دا معلومات عام دي، چې ګواکې خوب د یاداښت په چټکولو کې مرسته کوي، خو دا چې په دماغ کې څه کېږي، په دې اړه تاوده بحثونه شوي دي.
