د مالټې څښاک څومره ارزښت مند دی!
مالټه د ويټامین C غوره سرچینه ده چې په خوړلو سره یې د پوستکي ښکلا، د سترګو ځير او د وجود دفاعي سیسټم پياوړی کېږي. دغه راز د یوې نوې څېړنې پر اساس په ورځنۍ توګه د مالټې او یا یې هم د جوسو څښل مغزو ته ارامښت ورکوي.
د برېټانیې د «ريډينګ» پوهنتون روغتیا پوهانو د خپلې یوې نوې څېړنې پر مهال د دوو میاشتو لپاره له ۶۰ تر ۸۱ کلونو پر عمر لرونکو کسانو ۵۰۰ ملي لېټره د مالټې جوس وڅښل. د څېړنې پر مهال د دغو خلکو په خبرو کې تعادل او برابروالی، د مغزي وړتیاوو او اورېدلو حس او ځواب ویلو کې په تدريج سره غوره والی راغلی و.
دغه روغتیا پوهان وايي، په مالټه کې د «فلووینویډز» په نوم کیمیاوي ماده په زیاته اندازه شته چې د مغزو د پوهېدو او معلوماتو د زېرمتون تر یوې مهمې برخې «هیپو کمپس» پورې د سیګنال او پیغام رسولو پروسه پياوړې کوي. روغتیا پوهان وایي چې د مالټو جوس د ذهن د پیاوړتیا ترڅنګ د ځينو ناروغیو په مخنیوي کې هم ګټور تمامېدای شي؛ ځکه دا هغه طبيعي مېوه ده چې خوړل او د جوس څښل یې په هېڅ ډول بدن ته زیان نه لري.
