په دې وروستیو کې په پرمختللي هیوادونو کې د رومي بانجانو د رُب استعمال مخ په زیاتیدو دی. د رومي بانجانو د رُب استعمالوونکي وايي چې د رومي بانجان رُب د انسان پوټکي او ویښتانو ته له اندازې زیاته ګټه لري. دلته مو د رومي بانجان د رُب له ځینو مشهورو ګټو سره اشنا کوو.

د رومي بانجان د رُب استعمال د پوټکي ښکلا لپاره
رومي بانجان له اندازې زیاته د لایسوپین نومې مواد لري کوم چې د اکسیډنټ ضد پیاوړی خاصیت لري. لایسوپین نومې مواد د پوټکي هغه برخه چې د لمر وړانګو سوزولی وي بیرته رغوي. رومي بانجان زیاته اندازه ویټامین اې (A)، سي (C) او کې (K) هم لري کوم چې د پوټکي په نرم ساتلو کې ځانګړی اغیز لري او له مختلفو زیانونو څخه يي ژغوري. تر ټولو عجیبه خبره دا ده چې د رومي بانجانو له پخولو سره په رومي بانجان کې د لایسوپین اندازه نوره هم زیاتیږي. په لایسوپین کې شته نو ګټور مواد او مرکبات په پوټکي کې شته کولاجن نومې موادو تولید زیاتوي او د انسان پوټکي ته ځانګړی ښکلا بښي.

په یاد ولرئ چې په بازارونو کې شته د رومي بانجان رُب کې سرکه استعمال شوی کوم چې د رومي بانجان پورته یادې شوې ګټې له منځه وړي نو له همدې امله په کور کې د جوسر په مرسته د رومي بانجان رُب جوړول او استعمالول به يي له اندازې زیاته ګټه ولري.

که غواړئ د مخ پوټکی مو تازه او ښکلی وي نو د رومي بانجان رُب د ۱۵ دقیقو لپاره پر خپل مخ ووهئ او د وخت له پوره کیدو سره يي په یخو اوبو ووینځئ. دغه عمل ډیر ژر د پام وړ اثر کوي.

د ویښتانو ښکلا لپاره
د رومي بانجانو رُب خپل ترکیب کې د تیزابو مختلف ډولونه لري کوم چې د ویښتانو په بیخ کې جذبیدو سره ویښتانو ته ځانګړی ځلا وربښي. خو هیره دې نه وي چې په ویښتانو د رومي بانجانو د رُب استعمال په ویښتانو کې د پخې لامل هم ګرځي.

د پنځو دقیقو لپاره د رومي بانجان رُب په خپل ویښتانو ووهئ او له هغې وروسته يي په یوه ښه شامپو په ښه ډول ووینځئ. دغه عمل ویښتانو ته د پام وړ ځلا او ښکلا بښي.