جنيات يو موجود مخلوق دی چې له وجود څخه انکار يې کفر دی ځکه چې دجنياتو د وجود څخه انکار له قرآن او سنتو نه انکار دي نو پدې بنا د جنياتو په وجود ايمان يو له جملې د ايمان په غيبو دی مونږ هغه نه وينو د اثبات لپاره د الله ج او پيغمبر ص په ريښتنو خبرو باور لرو .

الله تعالی د ابليس او د هغه فوځ په باره کې فرمايي :[إِنَّهُ يَرَاكُمْ هُوَ وَقَبِيلُهُ مِنْ حَيْثُ لا تَرَوْنَهُمْ] (هغه اود هغه ملګري تاسې له يو داسې ځای څخه وينی چې تاسې يې له هغه ځای څخه نشی ليدلای ) اعراف /۲۷ ) .

جنيات له اور څخه پيدا شوی دی چې ځنې يې مسلمان او ځنې کافر دي .

«  وَأَنَّا مِنَّا الْمُسْلِمُونَ وَمِنَّا الْقَاسِطُونَ »

ځنې د مونږ مسلمان دي او ځنې کافر (جن ۱۴ ) .

  جنيات په عبادت مکلف دي رسول د ثقلين حضرت محمد صلی الله عليه وسلم د انس او جن دپاره مبعوث شوی دی هغوی د رسول الله ص په حضور کې حاضر شول اوقرآنکريم ته یې عوږ نيولی .

الله سبحانه وتعالی فرمايي : « قُلْ أُوحِيَ إِلَيَّ أَنَّهُ اسْتَمَعَ نَفَرٌ مِنَ الْجِنِّ فَقَالُوا إِنَّا سَمِعْنَا قُرْآنًا عَجَبًا (١)يَهْدِي إِلَى الرُّشْدِ فَآمَنَّا بِهِ وَلَنْ نُشْرِكَ بِرَبِّنَا أَحَدًا (٢)»

ووايه (ای پيغمبره ! ) ماته وحې راليږل شوی ده چې د پيريانو يوې ډلې په غور سره قرآن ته عوږ کيښود ،بيا له بيرته ستنيدو وروسته يې خپل قوم ته وويل مونږ خورا يو عجيب قرآن اوريدلی دی چې د سمې لارې لورې ته لارښونه کوي نو له دې کبله مونږ په هغه ايمان راوړی اوس به مونږ هيچکله له خپل پروردګار سره څوک شريک نه کړو .