د بورې زیات استعمال اعصاب زیانمنوي
په دې وروستیو کې یو شمیر روغتیايي څیړنو ثابته کړې چې د بورې او نورو خوږو موادو زیات استعمال د اعصاب لپاره تباه کوونکی ثابت کیدی شي.
د کلیفورنیا د پوهنتون په یوې څیړنې کې ویل شوی چې په بورې کې شته فرکتوز (Fructose) نومې مواد د اعصابو حجرات زیانمنولو سره د مختلفو ناروغیو لکه شکر، د زړه ناروغۍ او الزایمر لامل ګرځي.
د دغې څیړنې ترسره کولو لپاره د شپږو اونیو لپاره موږکانو ته فرکتوز لروونکی اوبه ورکول کیده ( د انسانانو لپاره یو لیټر ساړه مشروب په اندازه) او له پایلو څخه څرګنده شوه چې د اعصابو په حجراتو يي منفي اغیز کړی.
په دغې څیړنې کې یوه مثبته پایله هم ترلاسه شوه. د اومیګا-۳ فټي اسید ډي ایچ اې (Omega-3 Fatty Acid DHA) له بورې څخه اعصابو ته رسیدوونکي زیان اغیز له منځه وړي.
دغه پایله د موږکانو یوې ډلې ته له فرکتوز (Fructose) سره د اومیګا-۳ فټي اسید (Omega-3 Fatty Acid) ورکولو څخه ترلاسه شوه. یعني که چیرې انسان د بورې له استعمال سره اومیګا-۳ زیات استعمال کړي نو یوه اندازه د بورې د زیانونو مخه نیولی شي.
د اومیګا-۳ فټي اسید (Omega-3 Fatty Acid) په کبانو او د سبزیجاتو په ځینو ځانګړو ډولونو کې پیدا کیږي.
