په اوسنیو بوختیاو کې د دفترونو ډېری کارکوونکي اړ دي چې په پر له پسې ډول د کمپیوټر تر شا کېني او خپل ورځني کارونه ترسره کړي.
خو وروستیو څېړنو ثابته کړې چې د څو ساعتونو لپاره په پرله پسې ډول ناسته له سګرېت څکولو هم مضره او خطرناکه ده.
په پرله پسې ډول ناسته د زړه او سرطان ناروغۍ پیدا کوي. په څېړنه کې د پرله پسې ناستې موده نه ده په ګوته شوې، خو ډاکتران سپارښتنه کوي چې له لږ ځنډ وروسته باید ناست کس د څو دقیقو لپاره ودرېږي او یا هم قدم ووهي.
ډاکتران وايي، که یو څوک د ورځې له ۸ تر ۱۰ ساعتونو پورې په ناسته خپل کارونه کوي د زړه، سرطان، مغز او هډوکو په ناروغيو یې د اخته کېدو چانس زیات دی.
د ورځې ۸ ساعته ناسته بېرته په یو ساعت سخت تمرین (سپورت) سره هم نه جبرانېږي. د ورځې په اوږدو کې دوامداره ناسته د هاضمې سيسټم له ستونزو سره مخ کوي او بدن ته په خپل وخت د اړتیا وړ مواد نه رسېږي.
دغه راز دومداره ناسته خېټه غټوي، هډوکي کمزوري کوي او بل دا چې انسان ټنبل اموخته کېږي.