په ټولنه کې د ښوونکي مقام
ښوونکی په انساني ټولنه کې د لوی مقام خاوند دی او د هغې سپيڅلې دندې ویاړ پر غاړه لري چې د هغه پر بنسټ یوه علم پاله، منوره او ښکلې ټولنه رامنځته کیږي. د ښوونکي په هکله د بېلابېلو نظریاتو خاوندان مثبتې نظریې لري چې د ښوونکي مقام یې ستایلی دی خو د اسلام ستر پیغمبر حضرت محمد (ص) د ښوونکي د مقام په هکله فرمایی: ( انما بعثت معلماً) چې ژباړه یې داسې ده: ( په تحقیق سره زه ښوونکی را لیږل شوی یم). په دې توګه آنحضرت (ص) نه یوازې د ښوونکي د مقام درناوی کوي بلکي پخپله یې هم ځان د ستر پروردګار له لوري هغه ښوونکی معرفي کړی دی چې انسانانو ته یې له ظلمت او تیارو څخه د الهي رڼایۍ او د اسلام د نجات بخښونکي دین په لوري لارښوونه کړې ده او په ټوله نړۍ یې له ختیځ څخه تر لودیځ او له شمال څخه تر جنوب پورې د رڼا وريښمینې وړانګې د نیکمرغۍ په ارشاداتو کې شیندلې دي.
د ښوونکي دنده له دې کبله ډیره مهمه او له ویاړونو څخه ډکه ده چې د هغه اړیکه مخامخ د انسانانو له روزلو سره تړاو لري او د ټولنې هغه رنځونه تداوي کوي چې د انسانانو روزنه او مغزونه یې تر حملې لاندې راوستلې وي ځکه چې د انساني ژوند هر راز بریاوې په پوهنه پورې تړلې دي. له همدې کبله ښوونکي ته زیاتره وخت د ټولنې روغیتاپال یا ډاکتر، د ټولنیزو رنځونو رغونکی، د وړانګو نوښتګر او د بشریت په منځکې د پلوشو لوبغاړی هم ویل کیږي.
د ښوونکي ټوله شپه او ورځ له خپلې سپیڅلې دندې سره یو ځای په مصروفیت کې تېرېږي په داسې ډول چې په درسي ساعتونو کې خپلې دندې ته حاضر او د تدریس په چارو لګیا وي او له رسمي څخه د فراغت یا رخصتۍ پر مهال د خپلې راتلونکې ورځې د تدریس پروګرامونه جوړوي، مضمونونه ګوري او راتلونکي لوست ته چمتوالی نیسي. نو معلومېږي چې ښوونکی په خپله شپه او ورځ کې ډېر کم وخت استراحت او کورنیو چارو ته بېلوي.
د ښوونکي دنده هغه مهال زیاته مهمه بڼه غوره کوي چې نوموړی د خپل نیت او عمل تر منځ واټن راکم کړي او په داسې یو سپيڅلي نیت خپلو ورځنیو فعالیتونو ته اوږه ورکړي، د تدریس چارې پر مخ بیایې او د ټولنې د بچیانو په روزلو کې خپل مسوولیتونه ادا کړي چې موخه یې په سالمې روزنې سره د موجوده نسل سمبالښت او د داسې یوې روښانه ټولنې رامنځته کول وي چې د پرمختګونو په روښانه پړاونو کې مزلونه وهي، د دنیا او آخرت د ښېګڼو په تله یې د ژوند ټولې چارې برابرې کړې وي.
د ښوونکي دنده په ټولیز ډول مهمه او د بریاوو ډکه ده خو هغه مهال دا دنده نوره هم د اهمیت وړ ګرځي چې ښوونکی په اړوند مضمون کې خپله علمي کچه لوړه کړي، خپله مطالعه زیاته او روزنیزه پياوړتیا جوته کړي او د تخصص درجې ته ځان و رسوي. همدارنګه هر زده کوونکی یا محصل د خپل اولاد په شان و ګڼي او خپله ټوله پاملرنه د هغوی د سالمې رزونې د ځواکمنتیا لوري ته جلب کړي.
د اغیزمنو مېتودونو په مرسته د زده کړې لوري ته د زده کوونکو را جلبول، له پوهې سره د هغوی د مینې او علاقې پیدا کول او په مسلکي روزنې سره د خپلو زده کوونکو سمبالول د غوره ښوونکو له دندو څخه دي. همدارنګه ښوونکي کولای شي چې د بریالیو تدریسي مېتودونو په پلي کولو سره خپل زده کوونکي د زده کړې داسې لارو چارو ته را و بولي چې په لږ زماني واټن او کم لګښت سره ټاکل شوو ښوونیزو موخو ته و رسېږي.
افغان ولس له خپلو ټولو ښوونکو او د افغاني ټولنې له حقیقي معمارانو څخه هیله لري چې د خپلې سپیڅلې دندې د ښه پرمختګ لپاره هر اړخیزې هڅې په کار واچوي او د دې هېواد د بچیانو لپاره داسې ښوونیز خدمات وکړي چې د زمانې ټولو علمي غوښتنو ته مثبت ځواب له ځان سره و لري او افغانان د تورتم له سیاچالونو څخه د پوهې، رڼایۍ او خود کفايۍ په لوري روان کړي.
ليکنه: ګل آغا احمدي وردګ
