غیبت څه ته وايي؟ حرمت، لاملونه، سزا او کفاره یې
د غیبت تعریف:
پسې شا د چا عیبونه بیانول.
حرمت يې:
الله پاک وایي: “ولایغتب بعضکم بعضا”
ژباړه: ستاسو ځینې دې د ځینو غیبت نه کوي.
رسول الله صلی الله علیه وسلم ویلي دي:
” د مسلمان مال، ځان او آبرو پر بل مسلمان حرامه ګرځول شوې ده.
*په کومو شیانو کې غیبت کېږي:*
د یوچا غیبت د هغه په دین، اخلاقو، بدن، مال، اولاد، نسب، ښځه، مېړه سره همدارنګه د سترګو، خولې په اشاره یا په قلم سره کېدای شي.
د غیبت لاملونه:
یو څوک ولې د بل چا غیبت کوي لاملونه يې په لاندې ډول دي:
۱ـ د ایمان کمزوي.
۲ـ د بدو او ګناهکاره خلکو ملګرتیا.
۳ـ حسد او کینه لرل.
۴ـ له دنیا سره مینه لرل او د نورو خلکو نه زغمل.
۵ـ بې کاري.
په کومو وختونو کې عیب بیانول غیبت نه شمېرل کېږي:
۱ـ په محکمو کې د یو چا له ظلم څخه شکایت کول.
۲ـ په ډاګه او ښکاره ګناه کوونکي او بدعت کوونکي عیبونه بیانول.
۳ـ د ځانګړې مسلې د پوښتلو پرمهال د چا عیب بیانول لکه د ابوسفیان ښځې چې رسول الله صلی الله علیه وسلم ته وویل: چې ابوسفیان یو بخیل سړی دی ماته دومره څه نه راکوي چې زما لپاره بسنه وکړي په ځواب کې ورته وویل شول چې په ښه توګه دومره د هغه له مال څخه اخله چې ستا او بچي لپاره دې بسنه کوي.
۴- د علم الجرح والتعدیل د درس پرمهال.
۵ـ د نکاح لپاره د نکاح د وړاندیزکوونکي عیبونه بیانول لکه د فاطمه بنت قیس په کیسه کې چې معاویه او ابوجهم دواړو د نکاح وړاندیز ورته وکړ د یو په اړه وویل شول چې ډېر سوټي سروانه دی او د بل په اړه وویل شول چې ډېر مسکین دی.
د غیبت سزا:
۱ـ په دنیا کې د خلکو له غیبت کوونکي څخه کرکه کېږي.
۲ـ په قبر کې به په سخت عذاب اخته وي.
۳ـ د قیامت په ورځ به يې ټولې نېکۍ هغو خلکو ته ورکړل شي چې د هغوی غیبت يې کړی وي.
د غیبت علاج:
۱ـ له الله څخه وېره.
۲ـ خپلو عیبونو ته پاملرنه کول او د هغه سمونه.
۳ـ له ځان سره محاسبه کول.
۴ـ تل د الله ذکر کول.
۵ـ له اړتیا پرته له خپل کور يا ځای څخه نه وتل.
د غیبت کفاره:
۱ـ د هغه چا خبرول چې غیبت یې شوی دی او بخښنه ترې غوښتل.
۲ـ الله ته د زړه له کومي توبه اېستل کېدای شي چې وبخښل شي.
سپارښتنه:
علماء وایي: غیبت د کینه کوونکو خلکو خوی دی، د سپیو دسترخوان دی او د فاسقانو او فاجرانو کتخ او خوراک دی.
وایي: که څوک له غیبت څخه چاره نه لري، نو د خپل مور او پلار غیبت دې وکړي ترڅو يې نیک اعمال هغوی ته ورسېږي.
