د کورني ژوند د نېکمرغۍ په اړه زرينې لارښوونې

د ښځو له پاره:

۱- خپل خاوند دې تل د سهار له اذان څخه پينځلس دقيقې وړاندې راويښوه، نه هغه وخت چې اذان وشي. له راويښېدو وروسته ور ته مخکې د موسم په پام کې نيولو سره ګرم يا يخ مشروب ورکړه، په ځانګړې توګه که په دغه ورځ روژه نيسي (نو لږ د وخته يې راويښ کړه).

۲- تل هڅه کوه سهار له هغه وړاندې راويښه شې، او د حمام کولو له پاره ور ته اوبه، او د سهار چای تيار کړې. د اغوستنې د کاليو په برابرولو کې ور سره مرسته وکړه، او کوچنيان دې هم له هغه سره د سباناري د يو ځای خوړلو له پاره راويښ کړه.

۳- په خندا او خوښۍ سره يې د کار له پاره رخصت کړه، او له چټکو او عسکري امرونو څخه ډډه وکړه. که په ګرځنده تيليفون ور سره خبرې کوې، په خبره يې ښه ځان پوهه کړه.

۴- کور دې تل پاک، سوتره، او خوشبويه ساته، که څه هم چې ستړې يې.

۵- کور ته دې د څښتن له راتګ څخه وړاندې ځان پاک او سينګار کړه. همدا راز دې کوچنيان هم پاک کړه، او پاکې جامې ور واغونده.

۶- کله چې له کار څخه کور ته راستون شي، د کاليو په اېستلو (او د کورنۍ سودا ځای په ځای کولو) کې ور سره مرسته وکړه. ترې وپوښته چې ورځ دې څنګه وه؟ او ور ته ووايه چې ډېر مې په زړه ورېدې.

۷- د خوراک يا څښاک له پاره ور ته داسې څه راوړه چې خوښيږي يې.

۸- هيڅکله هم د هغه له ويده کېدو وړاندې مه وېده کېږه. وخت په وخت ترې پوښتنه وکړه که څه شی يې په کار وي، خو پام دې وي چې په بې ځایه پوښتنو يې تنګ نه کړې.

۹- د شریعت په چوکاټ کې يې د خپلوانو او دوستانو هرکلی کوه، او په راتګ يې د ستړيا احساس مه کوه.

۱۰- کله يې چې کوچنيانو څه شی خراب کړي يا لوبې پرې کوي، نو پړه يې پر هغه مه اچوه چې ادب يې نه دی ورښودلی، او مه سترګې ور اړوه چې راشه دا کار نو ته سم کړه.

۱۱- کله چې در ته څرګنده شوه هغه د ځينو خپلوانو په پوښتنه کې پاتې راغلی، د هغه په استاځيتوب يې ته پوښتنه وکړه.

۱۲- که کوم نامناسب کار يې کړی وي، هغه ته څه مه وايه او په خپله يې په پوره ادب سره سم کړه، مګر دا چې له بريده واوړي، نو بيا په کار ده چې په خوږه ژبه يې پرته له دې چې پړه پرې واچوې، ور ته پام کړې.

۱۳- زيار وباسه د هغه په کورنۍ کې ورګډه شې، له هغوی سره د کور په کارونو کې، پرته له دې چې خپل کرامت دې له پښو لاندې کړې، مرسته وکړه. وخت په وخت ور ته ډالۍ ورکړه، مګر هيڅکله هم ترې د سوغاتونو هيله مه لره، ځکه چې ښايي هغوی يې در نه کړي.

۱۴- ستا او د ميړه د خپلوانو تر مینځ دې ناندريو او تا-ويلي ما-ويلي ته زور مه ورکوه، او مه له دې کبله د هغوی کور ته تګ په ځان بندوه چې ستا په حق کې يې تېری کړی، بلکې ور شه، خو د مېلمنې په څېر، نه د کور د مېرمنې په څېر.

۱۵- که د خاوند کوم خپلوان ستا په حق کې تېری کړی وي، نو غچ اخيستلو ته دې د ميړه د اړ کولو له پاره د ژړا او غوغا له وسلې کار مه اخله، ځکه چې نه يې تل په دې چلونو تېر اېستلی شې، او نه هم دا کار په اسلام کې ځای لري.

۱۶- ستا او د خاوند تر مينځ اختلافاتو ته دې دومره زور مه ور کوه چې هغه اړ کړې، ستا په اړه بل چا ته ګيله وکړي.

۱۷- نارينه تل په خپل کار کې ډوب وي او هماغه يې نړۍ ګرځيدلی وي، نو هڅه وکړه هره ورځ ور ته د هغه د چاپيريال د پېښو په اړه معلومات ورکړې، له ځايي او نړيوالو خبرونو څخه يې خبر کړې، او همدا راز ور سره هغه ديني معلومات شريک کړې چې په دې ورځ کې دې زده کړي دي.

۱۸- مه يې په مخ کې کوچنيانو ته په غوسه کېږه، او مه ور ته د هغوی د ويرانکاريو ګيلې کوه، مګر که (هغوی ستا په خبره نه سمېدل او) غواړې هغه پرې خبر کړې، خو دا هر څه بايد تر وسه وسه لږ، او د لږ وخت له پاره وي.

۱۹- د داسې ورځنيو ستونزو په اړه دې ور ته خبرې مه کوه چې يوازې دې بدايسي (او حقيقي ستونزه نه وي) او هغه پکې مرسته نه شي کولای.

۲۰- کله چې ستا له خوا کوم چا ناسم کار وکړ، پرته له دې چې د ځان يا تېروتونکي پر کرامت پښې کېږدې، بخښنه ترې وغواړه.

۲۱- کله يې چې ستا په اړه کوم ناسم ګام پورته کړ، دستي يې مه ملامتوه، بلکې يوه ورځ، دوه صبر وکړه او بيا يې په خوږه ژبه پوه کړه. پرته له دې چې د هغه په تېروتنه وغږېږې، په دې وغږېږه چې هاغه ډول کار يې تا ځوروي.

۲۲- هر وخت ور ته يو څه شی ډالۍ کوه، او د ګرځنده تيليفون له لارې دې ور ته هره ورځ له مينې ډک پيغامونه لېږه.

۲۳- هيڅ ورځ داسې مه تېروه چې هغه ته پکې د خپلې مينې څرګندونه و نه کړې.

۲۴- روا، خو له وخت سره سم کالي اغونده. کوښښ وکړه د ورځې کالي بدل رابدل کړې، او هيڅکله دې هم بايد ټوله ورځ په هماغه يو ډول کاليو کې و نه ګوري.

۲۵- وخت په وخت د کور د سامان د اېښودلو ځايونه بدلوه، رابدلوه، او هم دې وخت په وخت د وېښتانو ترتيب او د سينګار بڼې ته تغير ورکوه.

۲۶- د هر کار له کولو وړاندې ور څخه اجازه اخله، که هغه له کور څخه وتل وي، که په کور کې د څه شي تغيرول، او يا هم د څه شي اخیستل يا خوراکي نظام پلي کول وي.

۲۷- وخت په وخت ور ته د خپل ګډ ژوند د بختورو او خوږو شېبو کيسې کوه، په ځانګړې توګه د واده د لومړنيو وختونو د يادونو.

۲۸- د هغو خبرو يادونه ور ته کوه چې د کوژدې پر وخت به يې در ته کولې.

۲۹- د خپلو غوښتنو او فرمايشونو په زياتوالي يې چې په وس کې يې نه وي، مه تنګوه. کله چې غواړې د خپل ژوند د شرايطو ښه کولو ته يې وهڅوې، داسې مه ور ته وايه چې د فلانۍ ميړه خپلې ښځې ته دا شی اخيستی او د بیستانۍ ميړه خپلې ښځې ته دا شی، بلکې هر څه ور ته په خوږه او ارامه ژبه ووايه. تل د هغه د جېب پام ساته (هسې نه چې ټکه يې لا په جېب کې پيدا شوې نه وي او تا وخته ور ته د لګښت ځای کتلی وي).

۳۰- هيڅکله هم هغه ته دا مه وايه چې تا کولای شول له ده څخه غوره ميړه پيدا کړې. هماغه څوک ستا په ارزښت ښه پوهيږي چې ستا واده ته يې زړه ښه کړی، نو په کار ده چې شکر پرې وباسې.

۳۱- هڅه وکړه په خپل ځان کې دې تل د ښه توب په لور بدلون راولې، او خپله عامه او ديني پوهه دې زياته کړې.

۳۲- د هغه نوم تر څنګ چې په عادي وختونو کې يې پرې رابولې، يو بل نوم ور ته غوره کړه چې د مينې پر وخت يې پرې رابولې.

۳۳- کله چې په کوم کار بوخت وي او ډوډۍ ترې ناوخته شوه، (د کار د چاپيريال په پام کې نيولو سره) په خپله يا د ګرځنده تيليفون په وسيله ور ياد کړه چې د ډوډۍ وخت دی.

۳۴- تل ور يادوه چې له خپلو خپلوانو او دوستانو سره وګوري، دا کار هغه ته د ازادۍ حس ورکوي.

۳۵- له خپل ځان سره د پاتې کولو او د خپلې کورنۍ او دوستانو له ليدنې څخه د مخنيوي له پاره ور ته د پوچو بهانو له جوړولو څخه ډډه وکړه. تل ريښتيا ور ته وايه، هغه دې په زړه پوهيږي، خو تا ته نه وايي، او بل دا چې دا هم د مسلمانې خوی نه دی چې تل يې ځان له ميړه پورې پينه کړی وي.

۳۶- د سبا له پاره ور ته د اغوستلو کالي برابر کړه.

۳۷- که غواړې له خوبه يې را ويښ کړې، په زوره اواز مه ور ته کوه، بلکې په غوږ کې ور ته پسپسک وکړه او مخې ته يې وخانده.

۳۸- تل ور ته ځان خوشحاله ښيه، خو که طبيعت دې ګړ بړ وي او د خوښۍ څرګندونه نه شې کولای، بس تبسم کوه.

۳۹- که د څه شي غوښتنه ترې کوې، نو په خوږه ژبه او ارام استدلال يې ترې وغواړه.

۴۰- تل ور سره په تګ، کېناستو، او خبرو کې دروند او له شخصیته ډک چلن کوه.

۴۱- د خپلو کوچنيانو له زړه راښکونکو خبرو او کارونو څخه يې خبر ساته.

۴۲- که په څنګ کې يې يې، هيڅکله هم شا مه ور اړوه.

۴۳- د اختلاف په صورت کې هيڅکله هم له کوره مه وځه، او مه کوټه پرېږده، بلکې سوله او جوړجاړی ته پيل کړه، که څه هم چې ملامته نه يې بخښنه ته ترې وغواړه، ځکه چې د نر له خولې د بخښنې کلمه ډېره په سختۍ وځي.

۴۴- هغه ته داسې وښيه چې د نړۍ په نارينه وو کې تر ټولو ښه سړی دی، او په خپله هم په دې باور اوسه (ځکه چې که له هغه څخه غوره څوک وي، هغه ستا نه، بلکې د نورو دي).

۴۵- که د خلکو په مخکې در ته په غوسه شو، ځواب مه ورګرځوه، او د هغه د خبرې له خلاصېدو وروسته دې خپله خبره پرته له دې چې په خبرو کې دې تغير راوړې، په عادي توګه پوره کړه، او لکه په ۲۱مه شماره کې مو چې وويل ورځ، دوه وروسته يې خپلې نيمګړتيا ته پام کړه.

۴۶- که په يوازيتوب کې در ته احساساتي شو، ور ته وخانده، که هماغسې په غوسه وو، لوبې ورسره وکړه، که بيا هم سم نه شو، غلې شه او تر هغې چې تا ته په خبرو لګيا وي، له کوټې څخه مه وځه.

۴۷- له خلکو سره د هغه د ژمنو او ليدنو د تنظيم په مهال وېش کې ورسره مرسته وکړه.

۴۸- د هغه د ورځنيو پېښو په اړه خبرو ته يې په ښه ډول غوږ کېږده، او له دې کار څخه ستړې کېږه مه، ځکه چې که یوه ورځ دې په ستړيا پوه شو، بيا به هيڅکله هم خپله کيسه در ته و نه کړي.

۴۹- که چېرې يې ستا د حق پر ځای کولو کې پاتې راتګ له بريده واوښت، ليک ورولېږه او پکې په ډاګه کړه چې ليدو ته دې يې زړه شوی، که ځواب يې در نه کړ، ور ته ووايه چې لريوالي يې در باندې ناوړه نفسي اغېز کړی.

۵۰- له تا سره د چکر تر څنګ، هڅه وکړه دې ته يې اړ کړې چې له خپلو خپلوانو يا ملګرو سره په کال کې يو وار د رُخصتيو په وخت کې په چکر لاړ شي، تر څو يې اعصاب ارام شي.

۵۱- کوچنيانو ته دې دا فکر مه ورکوه چې هغوی د خپل پلار د نا ارامۍ لامل ګرځي، او مه يې غلي کېدو ته په زوره اړ کوه (تر څو يې له هغه سره کينه پيدا نه شي)، بس همدومره يې پوه کړه چې پلار يې ټوله ورځ په کار کې ستړی وي نو په کار ده چې مونږ ور ته د دمې ارام چاپيريال جوړ کړو. په خپله هم د هغه د شتون په وخت کې کوچنيانو ته مه په غوسه کېږه تر څو يې د هغوی ژړا په تکليف نه کړي. که هغه ويده وي، نو له خپلو کوچنيانو سره دې په بله کوټه کې اوسه، لوبې ور سره وکړه، او د هغه غوږونو ته له شور او زوږ جوړولو څخه ځان وساته.

۵۲- لکه څنګه چې خپل ماشوم ويده کوې، هماغسې دې خاوند هم ويده کړه، او له ويده کېدو مخکې ور ته يوه پياله ګرمې شيدې، يخې اوبه، یا ګرم چای ورکړه.

۵۳- د خيالي او افسانوي مينې هيله مه ترې لره، بلکې د دې هڅه وکړه چې د هغه له طبيعت سره ځان جوړ کړې، ځکه چې د طبيعت بدلول ستونزمن کار دی.

۵۴- ستا د چلن په څېر چلن هيله ور څخه مه کوه، او مه له خپل ښه چلن څخه له دې کبله لاس اخله چې ستا په څېر چلن نه در سره کوي، بلکې صبر وکړه، د وخت په تېرېدو به په خپله سم شي.

۵۵- د څو ښځو د درلودلو په اړه هيڅکله هم مه ور سره غږېږه، او مه ور سره په دې کې لانجه کوه. که ته له دې کار څخه وېره لرې هم، هغه پر ځان مه پوه کوه.

۵۶- هغه دې د ژوند يوازينی محور هم مه جوړوه، او مه د هغه له پاره له خپلو کوچنيانو څخه بې پروا کېږه، بلکې له هغه، او خپلو کوچنيانو سره په چلن کې له خدايه ووېرېږه او د هغه لارښوونې په پام کې ونيسه.

۵۷- د هغه د ازادۍ د سلبولو هڅه مه کوه، باور پرې وکړه مګر پام پرې لره. د هغه له ملګرو او اشنايانو څخه د هغه په اړه د معلوماتو له اخيستلو څخه ډډه وکړه.

۵۸- د هغه په شخصي کارونو، يا کاري اړيکو کې د ځان د ننه کولو هڅه مه کوه، مګر دا چې مشوره در څخه وغواړي، په داسې وخت کې بيا ور ته سمه مشوره ورکړه. (مګر په مشوره کې يې د نورو د حق خوړلو، يا يوې ځانګړې مشورې منلو ته مه اړه کوه)

۵۹- بايد هغه ته د دې احساس ور نه کړې چې لنډ فکر لري، او دا چې د هغه رأيه تل ناسمه وي، که څه هم چې په ريښتيا هم داسې وي.

۶۰- په کار ده چې د هغه ملګرو او اشنايانو سره دې اړيکې روغې وساتې، تر څو له هغوی سره د کتلو پر وخت ستا له شتون څخه و نه ويريږي.