د ویټامین ګولۍ انسان د زړه او سرطان په ناروغۍ اخته کوي
په امریکا کې شوې یوې څيړنې ثابته کړې چې د ویټامین ګولۍ کولی شي انسان په مختلفو مهلکو ناروغیو اخته کړي.
دغې څیړنې ثابته کړې چې د ملټي ویټامین (Multi Vitamin) ګولۍ زیات استعمال په انسان کې د زړه او سرطان ناروغیو لامل ګرځي او هغه کسان چې دغه ګولۍ زیات استعمالوي له دې سربیره په ځینو نورو ناروغیو هم اخته کیږي.
د سرطان برخې یو پروفیسر چې په دغې څیړنې کې يي برخه اخیستی و وویل چې د څیړنې په دوران ثابته شوه چې غذايي مواد لرونکي ګولۍ د انسان پر روغتیا منفي اغیز لري او په انسان کې د زړه او سرطان ناروغیو خطر زیاتوي.
په انګلینډ کې د یو راپور پر بنسټ په ۲۰۱۴ زیږیدیز کال کې ویټامین لرونکي ګولۍ له خرڅولو څخه مختلفو کمپنیو ۴۰۰ میلیونه یورو ګټه ترلاسه کړې خو دغه نوې څیړنه به د ویټامین ګولۍ وړاندې کوونکي کمپنۍ ډیر زیات زیانمن کړي.
که څه هم د روغتیايي کارپوهانو په وینا دغه ګولۍ د انسان د بدن اړتیا نشي پوره کولی خو بیا هم د نړۍ په مختلفو برخو کې د دغه ډول ګولۍ استعمال مخ پر زیاتیدو دی او خلک يي په زیاته اندازه استعمالوي.
باید په دې پوه شو چې یوازې طبیعي خواړه کولی شي د انسان د بدن اړتیا پوره او د مختلفو ناروغیو مخه ونیسي. د بدن ویټامین او نور اړین مواد پوره کولو یوازینی او ګټور لار د طبیعي خواړه استعمال دی.
