![د روژې حکم څه دی؟ 1 2K 49181](https://wasiweb.com/wp-content/uploads/2018/12/2K-49181.png)
د روژې حکم څه دی؟
د رمضان د مبارکې مياشتې روژه نيول په هر عاقل، بالغ مسلمان باندې فرض ده (چې کوم شرعي عذر ونه لري) او منکر ور څخه کافر دى. سورة البقره اية ١٨٤ فقه السنة ١/٣٨٣
څلورم بحث: د روژې ځېني ډولونه:
روژه په څو ډوله ده،
فرض، لازم (واجب)، سنت ، حرام، مکروه
١: د رمضان د مبارکې مياشتې روژه فرض ده.
٢: نذري روژه لازم او واجب ده.
٣: د عاشورا (د محرم لسم)، د عرفې ورځ، د دوشنبې او پنجشنبې ورځ همدارنګه د ايام البيض (د هرې مياشتې ديارلسم، څوارلسم، پينځلسم) روژې سنت دي،چې په صحيح رواياتو کې يې ذکر راغلي دي.
فقه السنة ١/٣٩٧-٤٠٢ مشکوة المصابيح ١/٦٣٣-٦٤ (ط بېروت)
٤: ناروا (حرامه) روژه: يانې په دغو ورځو کې روژه نيول الله پاک حرامه ګرځولې، لکه: د کوچني او ستر اختر په ورځ روژه نيول، همدارنګه د ستر اختر د دويمې، درېيمې او څلورمې ورځې روژه نيول ناروا دي چې ديته ايام التشريفق وايې. د تل لپاره روژه نيول چې يوه ورځ هم نه افطار نکوي، او دوه، درې … ورځې پرلپسې روژه نيول چې صوم وصال ورته وايې ناروا دي.
فقه السنة ١/٣٩٣-٣٩٧ او مشکوة المصابيح کتاب الصوم .