خوښي څنګه تر لاسه کړو؟

دا ياد ولره چې کينه او له بل څخه د غچ اخيستلو هيله ستا د دُښمن په پرتله ستا د روغتيا له پاره ډېره تاواني ده.

خوښي د ځمکې پر مخ هغه یوازينی هدف دی چې ټول وګړي يې بې له کومې استثناء په لټه کې دي. مؤمنان او کافران دواړه د خوښۍ په لټه کې دي، مګر په بېلابېلو لارو چارو.

يوازې مؤمنان کولای شي ريښتينې خوښۍ ته ورسيږي. د خوښيو ټول ډولونه پر خدای له کلکې عقيدې پرته هسې د ځان تېراېستنه او پوچ چورتونه دي.
د خوښۍ د تر لاسه کولو په اړه څو لارښوونې:

۱- په دې پوه شه چې که ته د نن ورځې په دايره کې و نه اوسېږې، فکرونه به دې تيت او پرک شي، چارې به دې ګډې وډې او تشويش به دې زيات شي. دا حقيقت په لاندې حديث شريف کې څرګند شوی:
که په ماښام کې يې د سهار په تمه مه اوسه، او که په سهار کې يې، د ماښام په تمه مه اوسه. (بخاری)

۲- تېر وخت او څه چې پکې وو، ټول هېر کړه. په هغو شيانو کې نښتل چې تېر شوي، له ليونتوب پرته بل څه نه دي.

your ads

۳- پام چې راتلونکی در باندې واکمن نه شي ځکه چې هغه د غیبو په نړۍ کې دی، مه پرېږده چې له راتلو مخکې دي وځوروي.

۴- پام چې نيوکې دې زړه مات نه کړي، ټينګ اوسه. دا په ياد ولره چې ستا د ارزښت له لوړوالي سره سمې د خلکو نيوکې هم زياتيږي. له نيوکو څخه د خپلو نيمګړتياوو په پېژندنه کې ګټه واخله، او هڅه وکړه چې د ځان د سمون په لور در سره مرسته وکړي.

۵- په خدای ټينګ باور ولره او ښه کارونه کوه، ځکه چې دا هغه ترکيبي اجزاء دي چې نېکمرغه ژوند ترې جوړيږي.

۶- که سکون، ارامتيا، او اطمينان غواړې، دا ټول د خدای په يادولو کې موندلای شې.

۷- په دې ټينګ باور ولره هر څه چې پېښيږي، د خدای له ارادې سره سم پيښيږي.

۸- له هيچا څخه هم د دې تمه مه لره چې مننه در څخه وکړي.

۹- ځان داسې وروزه چې د تر ټولو بدې راتلونکې له پاره چمتو اوسې.

۱۰- ښايي هغه څه چې پېښ شوي ستا په ګټه دي، که څه هم چې ته يې په څرنګوالي نه پوهېږې.

۱۱- مؤمن ته چې څه ويل شوي د هغه په ګټه دي.

۱۲- د خدای نعمتونه وشماره او شکر پرې وباسه.

۱۳- په ياد ولره چې ستا حال تر نورو ډېرو غوره دی.
۱۴- ارامي له يوه ساعت څخه بل ته ځي. ريښتيا چې له هرې ستونزې سره ارامي شته.

۱۵- د سختۍ او اسانۍ په دواړو حالاتو کې بايد سړی خدای ته راوګرځي، مرسته ترې وغواړي او شکر يې وباسي.

۱۶- مصيبتونه او غميزې دې بايد زړه پياوړی، او فکر دې رغنده لوري ته راکاږي.

۱۷- مه پرېږده چې کوچني او بې ارزښته شيان دې د تباهۍ لامل وګرځي.

۱۸- تل په ياد ولره چې ستا رب بخښونکی دی.

۱۹- ارام سلوک خپل کړه او له غوسې څخه ځان ساته.

۲۰- ژوند ډوډۍ، اوبه او سيوری دی؛ نو له دې پرته د نورو موادو د نشتوالي له کبله مه ځورېږه.
وفی السماء رزقکم و ما توعدون
«ستاسې رزق او هغه څه چې ژمنه يې در سره شوې په اسمان کې دي- الذاريات، ۲۲»

۲۱- زیاتره بدې پېښې چې ګمان کيږي پېښې به شي، هيڅکله هم نه پيښيږي.

۲۲- له ځان څخه ډېرو کړېدلو ته وګوره، بيا په خپل لږ کړاو شکر وباسه.

۲۳- دا حقيقت تل په ياد لره چې الله تعالی له هغو وګړو سره مينه لري چې د ازميښتونو په وړاندې يې ثابت قدم پاتې شي، نو په دې لټه کې شه چې ته هم له هغو وګړو څخه شې.

۲۴- تل هغه دُعاګانې له ځان سره تکراروه چې رسول الله صلی الله علیه وسلم را ته پرې د سختۍ پر وخت د لوستلو امر کړی.

۲۵- د يوه ګټور کار په کولو کې زيار وباسه او بيکاري شا ته واچوه.

۲۶- مه اوازې په خپله خپروه او مه د نورو ته غوږ نيسه. که په ناپامۍ کې دې اوازه تر غوږو شوه، باور مه پرې کوه.

۲۷- دا ياد ولره چې کينه او له بل څخه د غچ اخيستلو هيله ستا د دُښمن په پرتله ستا د روغتيا له پاره ډېره تاواني ده.

۲۸- سختۍ او مصيبتونه ستا ګناهونه رژوي، خو په دې شرط چې په سړه سينه يې وزغمې.

ليکنه: عائض القرنی

ژباړه: ډاکټر غنچه ګل ارمان

Advertisement | Why Ads? | Advertise here

پوهنتون چینل

پوهنتون چینل درسره سبسکرایب او شریک کړئ

سبسکرایب Subscribe


Editorial Team

د واسع ویب د لیکوالۍ او خپرونکي ټیم لخوا. که مطالب مو خوښ شوي وي، له نورو سره یې هم شریکه کړئ. تاسو هم کولی شئ خپلې لیکنې د خپرولو لپاره موږ ته راولېږئ. #مننه_چې_یاستئ

خپل نظر مو دلته ولیکئ

wasiclinic.com
Back to top button
واسع ویب