حج له ګناهونو څخه پاکوونکی عبادت

ټولو ته جوته ده چې حج داسلام دپنځه ګونو اركانو څخه يو مهم ركن دى چې په دې سره داسلام دسپيڅلي دين اركان بشپړ كېږي او دقدرمنو حاجيانو ته دې مبارك وي .

داسلام ستر پېغمبر عليه السلام فرمايي : چا چې دالله تعالى درضا له پاره حج اداء كړ دهر ډول فسوق ، ا و فجور  ، جماع او دهغې دمقدماتو څخه يې ځان وژغورلو نو دګناهونو څخه بۀ داسې پاك راستون شي لكه په كومه ورځ دمور څخه زيږېدلى وي .

دمقبول حج نښانې هم همدادي چې ترڅه دمخه اخلاص ورسره مل وي ( من حج لله)

دوهم دا چې دحج هغې روزنيز چوكاټ ته يې ځآن برابر كړى وي  ،په دې معنى چې دهر ډول  ناوړه ويناوو او كړنو څڅه يې په ډېر دقت او ځيركتيا سره ځان ساتلى وي

داحرام دټولو محظوراتو څخه يې داطاعت په بنسټ ځان ساتلى وي . مناسك يې دپوهې له مخې ادا كړي وي  ، دمناسكو دادا په مهال يې كوم مسلمان ورور ته اذيت او تكليف نه وي رسولى . دڅښتن تعالى په دربآر په سپيڅلي حرم كې دحجر اسود سره د طواف په مهال دعرفات په ميدان يې دمغفرت دغوښتلوځولۍ غوړولي وي ، دخپل تېر عمر ګناهونه دغره په څېر انځور كړي وي او دهغې په اړ د حسارت او ندامت سر لوڅى لا س په دعا  دزړه دتل نه اوښــــكې بهوي ، هوكى ، رحيم او مهربان ذات به يې تش لا سى نا اميده نا هيلي نه پرېږدي . ګناهونه به يې بخښي

دخپل پراخه رحمت له مخې دحاجي صاحب دا خلا ص په پرتله دهغه دعجز اوبندګۍ په نسبت .

قدرمن حاجي صاحب تا خو دطواف په مهال په پوره جوش ولوله پاكه او ژوندۍ احساس دلبيك اللهم لبيك شعارونه ويل  آيا ددې دلبيك په معنى او مفهوم دځان پوه كړى او كه نه ؟

تا دخپل خالق څښتن تعالى سره دواقعي طاعت او بندګۍ عهداو ژمنه تازه كړه ،

هوكى دا ژمنه دې دميليونونو انسانانو په وړاندې په لوړ غږ سره وكړه .

تا خو په دنيا كې دحشر ورځې ته رته حالت دعرفات په ميدان وليد چې دلته ديو ځانګړي داحرام جامې دې په تن وې ، اما دحشر په ورځ بيا لدې نه هم سخت حالت وي ، دآدم عليه السلام ددنيا تر وروستي وګړي پورې خلك ، كافر ، مسلمانان نارينه ، ښځينه  ټول دخپل ټول ژوند په اړه خپل خالق ته ځواًب وركوي . او دهغه خالق تعالى له لورې به بيا هر چاته دخپل ژوند ټول ښه اوبد ريكارډ وړاندې شي چې له هغې وروسته بيا دښه عمل هيڅ چانس نشته ، او الله تعالى فرمايي : چې څوك دجهنم  داور څخه بچ شو يقينا چه هغه كامياب شو .

تاخو دخپل احساس له مخې او دحج دنسك دادا كولو په نيت جمرې ويشتلي چې په محلي ژبه يې شيطان ويشتل بولي .

كه خداى ج ستا حج قبول كړى وي ، الله ح يې قبول كړي ، پاك او سوتره له ګناهونو راستون شوى وې ، نو اوس بايد څه وكړې ؟

آيا دا سپينه صفحه به يوځل بيا په وړو او لويو ګناهونو ككړه كړي او كه به دهغه ژمنه په ياد وې چې لبيك به دې ويل ….

ايا درواغو ، غيبت ، بهتان ، شر ، فساد ، حرامو ، فحشا،.. بيا دشيطان په لمسون مخه كړى ، او كه دشيطان سره همغه دښمني ته دوام وكړي ، آيا له حج وروسته به ستا په نېكو اعمالو  كې زياتوالى ، ښه والى او اخلاص پيداشي ، او كه بۀ دحاجي صاحب په نامه گټلو بسنه كوې ..

مصطفی حماس