ویروس څه شی دی؟
ویروس (Virus)
ویروس له لاتیني کلمې (Venome) څخه اخيستل شوی دی، چې د (زهرو) په معنا دی. ویروس له ژوندۍ حجرې څخه بېرون غیر فعاله وي او د ژوند ټولې نښې نه لري او کله چې یوې ژوندۍ حجرې ته داخل شي؛ نو فعالېږي. دا ځکه چې ویروس یا DNA لري او یا RNA او د یو ژوندي موجود لپاره دا دواړه اړین دي او باید په خپله حجره کې دواړه ولري. نو په همدې خاطر ساینس پوهانو ویروس د ژوندیو او غیر ژوندیو موجوداتو ترمنځ طبقه بندي کړی دی.
په ژوندیو موجوداتو د ویروس اغېزه
ویروسونه ټول ژوندي موجودات اغیزمن کوي لکه: په انسان کې مختلفې ناروغۍ ګورڼ، شری، چیچک او ایډز رامنځته کوي. په نباتاتو کې هم د ناروغیو سبب ګرځي، لکه د رومي په پاڼو کې د موزیک په نامه ناروغي رامنځته کوي. ویروس بکتریا هم اغیزمنه کوي. لومړی بکتریا فاژ ویروس په بکتریا حمله کوي او وروسته خپل DNA بکتریا ته پېچکاري کوي. د ویروس DNA د بکتریا په داخل کې خپل ځان کاپي کوي او په اخر کې بکتریا چوي او نوی تولید شوی ویروس بېرون ته راځي. اصلا دا ویروس د بکتریا RNA څخه استفاده کوي.
