اسلام تاریختاریخ

په اندلس کې د اسلامي خلافت وروستۍ سلګۍ !

اندلس تاريخي فتحه ، هلته مادي او معنوي انقلاب ، اته سوه کلن تاريخ ، او بيا د اندلس سقوط يا له لاسه وتل ، د اسلامي امت بلخصوص د ځوان نسل لپاره د درسونو او عبرتونو يوه لويه پانګه ده ، چې د تاريخ د پنډو کتابونو په غيږ کې يې ځاى نيولى دى ، د اندلس پر لمن د طارق ورکيوتل ، د لرزيق ماتې ، د قرطبې ، اشبيليې ، اندلسې ، بلنسيې او غرناطې فتحه ، د يو لوى انقلاب اغاز ، د ابن حيان القرطبي ، ابن خلدون ، ابن حزم ظاهري ، ابو القاسم المجريطي ، او ابوالقاسم الزهراوي په شان ستر ، ستر علماء ، د الزهراء ، الحمراء ، الکامل ، المعشوق او المبارک پشان دنګې دنګې او برجورې ښکلې ماڼۍ ، او جنت نظيره ځمکه …. بيا خپلمنځي شخړې ، يو بل سرکوبول ، د خپل ورور خلاف له کفارو د مرستې طلب ، د قرطبې سقوط ، د اشبيليې سقوط ، ورپسې نور ښارونه ، بلاخره د غرناطې او ټول اندلس سقوط د تاريخ هغه باب دى ، چې يو ويده قوم د غفلت له درانه خوبه را بيدارولى شي ، کله چې اندلس د طارق ابن زياد رحمه الله په مبارکو لاسونو فتحه شو ، نو پيړۍ پيړۍ اندلس د مسلمانانو يوه محکمه کلا وه ، د علم ، روحانيت ، تمدن او اخلاقياتو مرکز وو ، د اسلامي خلافت يوه بې سارې او ريښتينې نمونه وو .

د اندلس له غېږې د اورپا پر ګوټ ګوټ باندې د علم ، تجربو او اخلاقو وړانګې پريوتې ، د اورپا لوى ، لوى پوهان په خورا ادب سره د قرطبې او غرناطې په درسګاوو کې د مسلمانو علماوو پر مخکي د شاګردي ګونډو ووهلې ، اندلس په خپله نامې غيږ کې داسې نوميالي علماءوروزل چې ، لا تر اوسه ترې د علومو تږي خپلې تندې خړوبوي ، او اندلس د ځمکې پر مخ د مسلمانانو جنت وو ، اندلس تر هغو د مسلمانانو اندلس وو ، چې تر کومه مسلمانان په خپل دين قايم ول ، د خداى تعالى په دين يې منګولې ښخې وې ، او د اسلام پنځه ګونو بناو تر څنګ د جهاد رکن ته پابند پاتې ول ، الهي سنت داسې دي چې خداى تعالى د يو قوم حالت تر هغو نه بدلوي تر څو هغه قوم په خپله خپل حالت تبديل نکړي ، چې په اندلس کې هم کټ مټ همداسي وشول ، کله چې اندلسيانو د خداى تعالى له مبارک دين څخه مخ وګرځاوو ، جهاد ، قرباني ، ننګ او غيرت يې تر پښو لاندې کړل ، له يو لوى مصيبت سره لاس او ګريوان شول.

د اندلس په محکم جوړښت باندې زلزله ګډه شوه ، د بغاوتونو ، ځانپالنو او تعصبونو چټل دريابونه په مستۍ شول ، اسلامي خلافت خپل شان او شوکت له لاسه ورکړ ، اندلس د زړبودۍ خزان راحصار کړ ، د بدن نازک غړي يې يو يو لکه خزان وهلې پاڼې ژيړ مخ پر ځمکه پريوتل ، قرطبه ، اشبيليه ، طليطله ، او نور ټول ښارونه د کفارو پر لاس سقوط شول ، او يواځې غرناطه د وروستي سنګر په حيث مسلمان قوم ته ورپاتې وه ، په کال 895 هق کې فردينند د غرناطې په لور لښکر کشي وکړه ، چې کله د غرناطې تر څنګ راورسيد ، ټول ښار يې محاصره کړ ، شاوخوا باغونه، فصلونه او اباد کلي يې تالا والا کړل ، مسلمانان له څلورو خواوو څخه محاصره شول ، محاصره ورځ تر بلې تنګېده ، او کابو اته مياشتي يې دوام وموند ، د ښار خلکو ابو عبدالله ته وويل ـ تر هغو چې زموږ په بدن کې روح پاتې وي تر هغو به موږ له دښمن سره مقابله کوو ، موږ د لوږې د مړيني په ځاى دا غوره ګڼو چې د جګړې په ميدان کې د دښمن په غشيو او نيزو ولګيږو او شهيدان شو ـ ـ ـ

سلطان ابوعبدالله د الحمراء په ماڼۍ کې عاجله غونډه راوبلله تر څو له دښمن سره د جګړې او سولې اړوند مشوره وکړي ، په غونډه کې ټولو ګډون والو په يو غږ د جګړې خبره کوله خو سلطان د جګړې پر ځاى په سوله خوښ وو ، غوښتل يې داسې سوله وشي چې مسلمانان د کفارو له ضرر څخه خلاص شي او د غرناطې ښار بې له کوم مقاومت څخه عيسويانو ته تسليم کړي ، ابوالقاسم يې په پټه فردينند ته ورولېږه ، تر څو د سولې خبرې ورسره وکړي ، فردينند چې کله د ابوالقاسم له خولې د سولې خبر واوريده ، ډير خوښ شو ، ځکه چې د جګړې له لارې د غرناطې نيول خورا ستونزمن کار وو ، د سولې خبرې پيل شوې ، پنځلس مادييز تړون چمتو شو ، دواړو مشرانو ورباندې لاسليكونه وکړل ، د تړون په دېارلسمه ماده کې راغلي وو چې مسلمانان به د شپيتو ورځو په دننه کې دالحمراء ماڼۍاو نور ټول سامان او اسلحې عيسويانو ته سپاري او سلطان به له خپلو ملګرو سره له ښاره وځي ، خو لا شپيته ورځې نه وې پوره چې عيسويانو خپل عهد مات کړ او د غرناطې په ښار لکه وږي ليوان ورکېوتل ، په ښار کې غلغوله جوړه وو ، کفارو له خوښۍ نڅيدل ، خو د مسلمانانو له زړونو يو خداى خبر وو ، عيسايان ټول د الحمراء ماڼۍ خو اته راجمع شول ، د ټولو سترګې د الحمراء د ښکلې ماڼۍ په لور کږې وې ، څو تنه سپاهيان د الحمراء ماڼۍ تر ټولو لوړ برج ته پوره شول او د اسلام سپين بيرغ يې ښکته وغورځاوه ، او پر ځاى يې د سپينو زرو صليب پورته کړ او د لمر په شغلو کې يې ځلکا پيل کړه ، له همدې ورځې نه د اندلس له جنت نظيره خاورې نه اسلامي نظام خپله کډه بار کړه ، انا لله وانا اليه راجعون

ليکوال : صميم اخندزاده

صافی بنسټ خبرتیا Safi Foundation Ads Donation

wasiweb.com

wasiweb.com Publisher Team publish your sent articles. you can send your articles to publish, also you can be author with us. Share the website and articles with your friends

خپل نظر مو دلته ولیکئ

Back to top button
وسیع ویب
error: