ګناهونه

سحر یا جادو څوډولونه دي

 تاسي خورا په زړه پوري پوښتنه مطرح کړیده دځواب له ځنډیدلو نه بښنه غواړم .

سحر یا جادوپه لغت کي د دوکې یا تیر ایستني په مانا راغلی دی، امام قدامه رحمه الله وایی چي سحر هغه منتر ته ویل کیږي چي په ویلوـ لیکلواو په عمل کولو سره یي دبل چا بدن،زړه ،یا هم عقل اغیزمن کیږي . 

امام راغب رحمه الله فرمایي دجادو څوډولونه دي : 

لومړی ډول یی نظر بندي یا شعبده بازي ده ددې ډول جادو هیڅ بنسټ نشته هر ډول شوخ او څالاک انسان پخپله څالاکي سره داسي څه کولای شي چي دهغه له ليدلو او په هغو باندي په پوهیدلو سره دعامو خلکو نظرونه او عقلونه پاتي راغلي وي .

د مسمریزم پوهان چي دخپل معمول په دماغ کومه اغیزه اچوي هغه هم په پورتني ډول کي ګډدی . داعراف په سورت کي د مصر د جادوگرانو په اړه ویل شوي (هغوي د خلکو په سترگو جادو وکړ) په سورت طه کي راغلي (دهغوي دجادو له امله د حضرت موسی علیه السلام په خیال کي داسي راغلل چي د رسیو ماران منډي وهي ) مانا داچي جادو گرانو چي کومي رسۍ او لاټۍ اچولي وې هغه نه خو ماران شوي وو او نه يي کومه منډه کړيوه بلکه دحضرت موسی علیه السلام قوت خیالیه دهغوي له کړو نه اغيزمن شوی وو او هغه څه ورته د منډي وهونکو مارانو په څیر ښکاريدل .

دوهم ډول جادو هغه دی چي په هغه کي له شیطانانو نه کار اخستل کيږي او دډول ډول کړو وړو په پایله کي د شیطانانو نزديکت او انډیوالي تر لاسه کيږي په سورة البقره کي راغلي چي (بلکه شیطانانو کفر وکړ چي خلکو ته يي جادو ور زده کاوه ) .

د جادو دریم ډول د کوم په اړه چي دجادو گرانو دعوا ده چي له امله يي مونږ د څيزونو ماهیت او حقیقت بدلولای شو أن تردې چي له انسان نه اس یا کوم بل حیوان جوړولای شو ، لیکن د اهل حقو څیړونکو پو هانو په اند دا له حقیقت نه لري او بې بنسټه دعوې دي .

په عام عرف کي هم هغه څه ته جادو وايي چي له شريعت نه پرته پکي له شیطانانو نه دمرستي داخیستلوپه پایله کي په نورو اغيزه کوي .

له شیطانانو نه دمرستي د تر لاسه کولو لپاره جادو گران شرعي حدودو تر پښو لاندي کوي په نجاست کي ککړ،دښه او بد،حلال او حرام ، روا او ناروا تر منځ توپیرونه له منځه وړي آن تردې چي د اړتیا په مهال خو غیرالله ته تر عبادت کولو او په ځینو مواردو کي د معصومو ماشومانو د ويني تر تويولو پوري خبر رسيږي . نعوذ باالله من ذلک .

د جادو د تعلیم او تعلم په ذرایعو کي د شتو خرابیو سربیره د جادو په موخو کي هم ډیري خرابۍ موجودي دي ،په عمومي توگه جادو د دوو زړونو تر منځ دجدايي راوستلو ، مينه په نفرت بدلولو،دوستي په دښمني بدلولو ، د خاوند او میرمني تر منځ دجدايي راوستلو ،چاته د مال او ځان تاوان وررسولواو ځینو نورو مفاسدو لپاره کارول کيږي .


په جادو کي د همدې اعتقادي او عملي خرابیو د شته والي له امله د جادو زده کړه او چا ته ور ښودل ،او په هغه باني عمل کول له یوې څیلمي حرام او ناروا دي ، بلکه دجادو ځیني داسي صورتونه هم شته چي له امله يي سړی آن کفر ته رسيږي .

په ډيریو احادیثو کي له جادو نه د ځان ژغورلو امر شوی ،په بخاري او مسلم شریف کي له حضرت ابو هریرة رضی الله عنه روایت شوی چي رسول الله صلی الله علیه وسلم فر مایلي له اوو هلاکوونکو شیانو نه ځانونه وژغورۍ چي یو يي له هغوي نه جادو هم ښودلی ،همداراز په بخاري او مسلم کي له حضرت ابن مسعود رضی الله عنه نه روایت دی چي فرمايي (څوک چي د نجومي ،جادو گر یا کاهن په لغویاتو د یقین په بڼه د هغه خواته ورغی نو هغه کفر وکړ په هغه کلام چي په حضرت محمد صلی الله علیه وسلم باندي نازل شوی ) .

په ابو داود کي له حضرت ابن عباس رضی الله عنه نه روایت شوی (چا چي علم نجوم زده کړ هغه د جادو گري یوه څانگه زده کړه اوس نو د هغه خوښه ده چي څومره زده کوي زده دي کړي ) .

امام ابن قیم فرمايي په جادو کي دمهارت تر لاسه کولو تړاو تر کفري او شیطاني کړو وړو پوري دی ، ځکه خو هم هغه څوک چي په کفر، شرک ، نجاست او خباثت کي ککړ او له الله تعالی، رسول الله او له اهل ایمانو سره په دښمني کي څومره مخکي وي هغومره يي جادو هم اغيز من وي ، له همدې امله د بت پرستو جادو د اهل کتابو تر جادواو د یهودو جادو بیا د هغو کسانو تر جادوچي د اسلام دعوه کوي ډیر اغيزمن وي.

علامه ابن خلدون فرمايي ( له جادوگر نه د ښیگڼي صدور نا شونی دی ،او نه هم جادوگر جادو د ښیګڼي په چارو کي کارولای شي .

له قرآنکریم ،نبوِي احادیثواو دسلفو له کتابونو نه دا په ډاگه کيږي چي جادو حرام، کفر او شرک دی ،او زده کول او ور زده کول يي دپالونکي څښتن غضب ته بلنه ورکول دي او پدې کي ددواړو نړیو تاوان دی .

خو په ډیر افسوس سره ښايي ووایو چي په جادو کي سره له دې ټولودنیوي او اخروي تاوانونوځیني مسلمانان (په ځانگړي ډول ميرمني) جادو گرانو ته ځي او له هغوي نه د خپلو ناوړو کړو وړو د پوره کولو په موخه تعويذات کوي او دهغوي په خبرو یقين کوي او ددې څه په ترڅ کي جادوگرانو ته نذرونه هم ورکوي بلکه په ځينو مهالونو کي خو د ماشومانو وينه هم تويوي او هر ناروا عمل کوي آن تردې چي کله نا کله خو خپل پت ،ايمان، مال او متاع تر جادو گرانو جاروي . نعوذ باالله من ذلک .

دمبارکو حدیثو کتابونو ته په کتلو سره دجادو له اغيزونه د ځان ساتلو لپاره علماء کرامو د قرآنکريم د پاي دلوري ددوو سورتونو (قل اعوذ برب الفلق او قل اعوذ برب الناس) تلاوت ډیر ګټور بللی ، ځکه نو هر سهار او بيگا ښايي په ځانگړي ډول د نوموړو سورتونو تلاوت وشي او ځان دي خپل پالونکي څښتن ته وسپارل شي هم هغه ذات ښه ساتونکی دی له هر ډول شر او فتنې څخه. 

safi foundation

wasiweb.com

wasiweb.com Publisher Team publish your sent articles. you can send your articles to publish, also you can be author with us. Share the website and articles with your friends

خپل نظر مو دلته ولیکئ

Back to top button
error: